Imaxe do noroeste da península ibérica tomada desde a Estación Espacial en 2013. Imaxe: NASA.
Imaxe do noroeste da península ibérica tomada desde a Estación Espacial en 2013. Imaxe: NASA.

Tres grandes oportunidades para ver a Estación Espacial sobre Galicia

A nave cruzará o ceo na noite do venres e o sábado durante case 10 minutos, pasando a carón de Vega, unha das estrelas máis brillantes

A mellora do tempo prevista a partir da tarde do venres, ademais de axudar a desfrutar do aire libre dentro das lóxicas restricións causadas pola crise da Covid-19, despexará os ceos e permitirá observar unha vez máis a Estación Espacial Internacional surcando o ceo galego. A nave, que orbita a Terra a uns 400 km de altura e a unha velocidade duns 28.000 km/h, cruzará sobre as nosas cabezas na noite do venres e o sábado.

Para vela (ademais da recomendación de que haxa pouca contaminación luminosa), hai que mirar cara ao suroeste sobre as 23.46 da noite do venres. Será un obxecto bastante visible no ceo (se non hai nubes), na magnitude das estrelas que máis brillan (-3,9). Comezará a ascender en dirección nordeste, ata estar case sobre as nosas cabezas, e encamiñarase cara a Vega, unha das máis brillantes do ceo no hemisferio norte.

Esta é a traxectoria que seguirá esta noite de venres a Estación Espacial Internacional sobre Galicia. A do sábado e o luns será moi semellante:

Mañá sábado poderá verse de novo, aínda que máis baixa no ceo e cunha magnitude lixeiramente menor, a partir das 23 horas en punto. Aínda que haberá varios pasos durante estes días, a Estación Espacial verase de novo con claridade o vindeiro luns, tamén sobre as 23 horas, e de suroeste a nordeste de novo, pasando preto de Vega. Ademais, as predicións meteorolóxicas, con sol e temperaturas suaves pola noite, axudarán a contemplar o espectáculo.

Ademais, nestes días é posible tamén observar no ceo algúns dos satélites da numerosa constelación Starlink, que sementou unha importante polémica polo seu impacto no ceo nocturno e a observación astronómica. Porén, hai moitos máis obxectos artificiais visibles no ceo, como contamos nesta reportaxe:

A Estación Espacial e moito máis: estes satélites tamén se ven desde Galicia

A estrela de Rosalía

Nestas semanas tamén é posible ver outro astro salientable no ceo: a estrela de Rosalía, nomeada a comezos deste ano. Con axuda de telescopio ou uns bos prismáticos (xa que é moi difícil vela a ollo nu), a HD 149143 sitúase na constelación de Ofiuco, polo que estes días hai que mirar cara ao leste a primeiras horas da noite (logo vaise movendo cara ao sur).

O ceo no amencer e o solpor

Ademais da observación puntual da Estación Espacial, o ceo dos vindeiros días, cunha mellora do tempo en Galicia, achegará unha oportunidade de observar algúns astros salientables. Mirando ao sur, e movendo logo a vista cara ao suroeste, tempo antes de amencer, poderase ver Xúpiter, Marte e Saturno nas constelacións de Capricornio e Acuario. Ademais, con pouca contaminación luminosa e un bo telescopio, será posible albiscar o cometa SWAN.

Imaxe

1 comentario

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.