Dous minutos antes da medianoite do sábado ao domingo, a comarca de Ordes viviu o meirande terremoto dos últimos anos. Foi no termo municipal de Frades, e moi preto de localidades como Sigüeiro (Oroso). Apenas vinte minutos antes, produciuse outro movemento de menor magnitude (1,9), uns quilómetros ao norte, e practicamente no punto polo que discorre a autopista AP-9.
Decenas de avisos
Como adoita acontecer nos terremotos de meirande entidade que teñen lugar en Galicia, o Instituto Geográfico Nacional recibiu decenas de notificacións do sismo, sobre todo desde as comarcas de Ordes, A Coruña e Santiago (Tordoia, O Pino, Oza-Cesuras, Carral ou Oroso), e mesmo desde as proximidades de Santiago de Compostela.
#terremoto 16/05/2020 23:58:16UTC SW FRADES.C mag=3.0 prof=0km cálculo revisado https://t.co/80UAYgMHCC
— IGN Sismologia (@IGN_Sismologia) May 17, 2020
O nivel de intensidade sentido nos avisos é, con todo, practicamente nulo. O grao II, segundo a clasificación establecida para medir a intensidade (distinta da magnitude) expón que estes sismos non causan ningún efecto nin nado, e que son sentidos en casos illados (menos do 1%) de persoas en reposo e “en posicións especialmente receptivas dentro dos edificios”.
A zona da comarca de Ordes non se enmarca nas máis habituais dos sismos en Galicia, aínda que si rexistra algúns tremores pequenos e illados na área que vai desde esta comarca ata Tordoia, Val do Dubra e Carballo, onde algunhas pequenas fallas poden provocar lixeiros movementos.
No que respecta ao resto de Galicia, en Ourense tivo lugar o meirande terremoto dos últimos 20 anos en setembro de 2019. Foi algo inferior ao que tivo lugar en novembro de 2018 en Melgaço, á outra beira do Miño, fronte á localidade pontevedresa de Arbo, con magnitude 3,8, e que rexistrou máis de 400 avisos ao IGN, desde todo o sur de Galicia e norte de Portugal. O outro meirande sismo en Galicia nos últimos anos tivo lugar en agosto de 2018 en Taboada, preto do encoro de Belesar, de magnitude 3,5.
