As inundacións están a marcar a tónica destes últimos días debido á chuvia continua que asola Galicia. Esta situación meteorolóxica está a provocar, ademais, que os solos galegos cheguen ao seu límite de capacidade de retención de auga. Os efectos das precipitacións poden observarse a simple vista nos cursos fluviais, pero tamén son detectados polos satélites. É o caso do Sentinel-1 de Copernicus, que permite observar a saturación do río Miño, actualmente baixo vixilancia da Xunta por aviso vermello, ao seu paso por Outeiro de Rei, Cospeito e Castro de Rei (Lugo).
As imaxes captadas polo satélite amosan unha comparativa entre o 15 de xaneiro e o 8 de febreiro, cunha diferenza de case un mes entre ambas. Nelas pódense ver os campos da zona lucense e, na fotografía máis recente, a enchente arredor do río Miño.
A Axencia Espacial Europa (ESA) e o programa Copernicus contan en órbita cunha serie de misións satelitais. Segundo informa o Instituto Xeográfico Nacional, esta constelación está formada por satélites equipados con radar SAR (Radar de Apertura Sintética), que permite obter imaxes de alta resolución a longa distancia para monitorizar inundacións sen depender da presenza de nubes nin da luz.
Este é só un dos exemplos de ríos en estado crítico debido ás chuvias. O Goberno galego tamén vixía por alerta vermella os ríos Mandeo e Cabeiro, ademais doutros vinte cursos fluviais en aviso laranxa ante posibles desbordamentos. Xunto coa necesidade de extremar as precaucións nas zonas afectadas, o Ministerio de Transición Ecolóxica desenvolveu unha ferramenta que permite comprobar o risco de inundación segundo o lugar de residencia.
