A área de Turismo da Deputación da Coruña continúa amosando os case 1000 quilómetros de costa que se poden percorrer na provincia, desde o límite setentrional da Estaca de Bares. Nesta terceira etapa da viaxe, o voo comeza sobre a ría de Ferrol, un dos escenarios clave no desenvolvemento da historia moderna de Galicia. O legado naval e militar da cidade e a súa ría, protexida no seu acceso polos castelos de San Felipe e da Palma e as baterías defensivas espalladas polos montes costeiros, segue moi patente nesta viaxe aérea.
Á outra beira da península que culmina na punta Coitelada, as vilas mariñeiras de Ares, Redes, Cabanas ou Pontedeume reciben a desembocadura do Eume que, á súa vez, dalle a man á chegada do Mandeo á ría de Betanzos. A costa, salpicada das localidades xa próximas á cidade da Coruña, deixa ver tamén as bateas máis ao norte do territorio, fronte a Lorbé, en Oleiros.
A viaxe pola costa atópase ao fondo coa maxestosa Torre de Hércules e a cidade da Coruña, espallada desde o istmo que achega as súas dúas beiras. A continuación chega outra construción faraónica, a do porto exterior, co seu dique adentrándose no Atlántico. Veñen logo praias ventosas, batidas pola ondada, como Barrañán, máis vilas mariñeiras como Caión e os extensos areais de Razo e Baldaio, que xuntos suman un dos máis longos de Galicia. Esta etapa finaliza no porto que abre a porta á Costa da Morte: Malpica de Bergantiños. A viaxe continuará.
Do Barqueiro a Cariño, polo aire: voo pola costa máis septentrional de Galicia
Entre Ortegal e Mugardos: viaxe polos grandes cantís galegos
