Entre Malpica e Fisterra discorre unha das rutas que máis sona adquiriu nos últimos anos na costa noroccidental de Galicia, o Camiño dos Faros. E entre estas dúas localidades, que para moitos marcan o comezo e o final da Costa da Morte, discorre tamén a nova entrega do vídeo da área de Turismo da Deputación da Coruña.
A viaxe comeza no porto de Malpica, que hoxe mantén a súa relevancia pesqueira, e ata non moito, a mediados do século XX, era un enclave importante na caza de baleas. Continúa o noso voo cara a praia de Seaia e a ermida de Santo Adrián do Mar, fronte ás illas Sisargas, que tamén se observan nas imaxes. Seguindo cara ao suroeste atopamos Punta Nariga, co seu moderno faro, un dos últimos erixidos en Galicia.
Polo bordo da costa continúase cara outro enclave cargado de simbolismo na Costa da Morte, O Roncudo. Nas rochas da contorna agóchanse algúns dos percebes máis aprezados do mundo, capturados durante decenios por mariscadoras e mariscadores que, como ben indican as cruces brancas chantadas nas rochas, pagaron ás veces coa súa vida.
Ao abrigo do Roncudo, e entrando cara a ría onde desemboca o Anllóns, está a vila de Corme. Continúa a viaxe polo esteiro da ría, custodiado polo Monte Branco, unha duna de grandes proporcións. E cruzamos cara a Laxe, a outra vila mariñeira da zona. Á volta da vila obsérvase o faro de Laxe e as salvaxes praias de Soesto e Traba, coa súa lagoa chea de lendas.
Prosegue o voo cara ao corazón da Costa da Morte, na vila de Camelle, a praia do Trece, o outro Monte Branco de Camariñas, o Cemiterio dos Ingleses onde descansan os náufragos do Serpent, o espectacular cabo Vilán e a vila de Camariñas.
Ao outro lado da ría adéntrase no mar a mítica Punta da Barca en Muxía. E chégase logo ao cabo Touriñán, que durante unha parte do ano é o último lugar no que se pon o sol na Europa Continental. Outra das salvaxes praias da zona, Nemiña, antecede ao final do camiño no cabo Fisterra.
Do Barqueiro a Cariño, polo aire: voo pola costa máis septentrional de Galicia
Entre Ortegal e Mugardos: viaxe polos grandes cantís galegos
Da Costa Ártabra á Costa da Morte: unha nova viaxe aérea polo litoral coruñés
