A aparición de mutacións fármaco resistentes constitúe un grave problema na loita contra os microorganismos patóxenos. Os métodos actuais, baseados na análise de resistencia xenotípica, non permiten predicir os cambios evolutivos, provocando a ineficacia dos tratamentos. Facer fronte á fármaco resistencia é precisamente o principal obxectivo do proxecto Preres (Predición das traxectorias evolutivas das proteínas cara á resistencia aos tratamentos antirretrovirais). A investigación posdoutoral conta co apoio do programa europeo Marie Skłodowska-Curie Actions, sendo a Universidade de Vigo a única institución beneficiaria cun orzamento de 181.150 euros.
Liderado por Valeria Zoni, investigadora do grupo de Evolución Molecular Computacional do CINBIO, o Centro de Investigación en Nanomateriais e Biomedicina da Universidade de Vigo, e coa supervisión do investigador Miguel Arenas, o proxecto pretende acadar un pioneiro método preditivo que aproveite a evolución molecular e a bioloxía computacional para predicir a evolución de dianas farmacolóxicas do VIH-1 e mellorar así a selección de terapias. Arrancaron o pasado mes de setembro e por diante quédanlle dous anos de intenso traballo.
Predición da resistencia aos tratamentos antirretrovirais
O obxectivo principal de Preres é aplicar técnicas de evolución molecular e bioloxía estrutural computacional para avaliar as traxectorias evolutivas das proteínas diana de fármacos do VIH-1 que conducen á resistencia contra os tratamentos antirretrovirais habituais. “Esta investigación ten o potencial de mellorar a selección de terapias para patóxenos ao proporcionar ferramentas de predición que teñan en conta a dinámica evolutiva molecular destes microorganismos”, explica a investigadora responsable do proxecto, quen tamén subliña que os resultados poderían supoñer avances no campo da evolución molecular, pois “esta metodoloxía tamén podería aplicarse ao estado evolutivo doutros patóxenos”.
Rozando os 200.000 euros, trátase dun proxecto con financiamento europeo altamente competitivo. “É moi satisfactorio saber que a nosa proposta foi avaliada de maneira tan positiva e seleccionada para recibir este apoio”, comenta o persoal investigador do grupo CME do CINBIO, pertencente á rede Cigus. Segundo Valeria Zoni, “esta investigación podería axudar a facer fronte á fármaco resistencia, o que sería un avance substancial nos estudos de evolución molecular”. “Para min é un privilexio formar parte desta proposta, pois a Unión Europea tamén promove numerosas iniciativas de formación e apoio destinadas a fortalecer o desenvolvemento profesional de investigadores financiados con fondos europeos”.
Podes ler o artigo completo do DUVI aquí.
