A choiva de estrelas das Delta Acuáridas pode verse nos ceos dende o 12 de xullo ata o 23 de agosto. Porén, esta fin de semana dará comezo o seu pico de actividade, que terá lugar dende o domingo ata o martes 30 de xullo. Durante estes días, os curiosos poderían chegar a contar entre 15 e 20 meteoros por hora cada noite se a escuridade o permite. A fase lunar destes días é minguante: nos ceos veremos en torno ao 69% da súa superficie, o cal deixará un brillo que podería dificultar gozar deste espectáculo que ten lugar cada verán. Ademais, segundo MeteoGalicia, algunhas zonas do norte e o sur de Galicia terán ceos nubrados durante as noites do domingo e o luns, dificultando así a visión das estrelas fugaces.
As Delta Acuáridas proveñen do cometa 96P/Machholz, e como o seu nome indica, aparecen no ceo xusto onde se atopa a constelación de Acuario. Por iso, a mellor maneira de velas é dirixir os nosos ollos á parte baixa da liña do horizonte. Outro aspecto que fai das Delta Acuáridas un fenómeno especial é a súa duración: mentras que outras choivas de estrelas adoitan durar uns días, o seu período de actividade é de máis dun mes.
A contaminación luminosa, o principal inimigo
Ademais duns ceos nubrados e dunha Lúa Chea, existe outro inconveniente que podería complicar o feito de ver como unha estrela fugaz percorre a noite fronte a nós: trátase da contaminación luminosa, e en Galicia tamén a temos. Ademais de complicar a observación do ceo nocturno, a contaminación luminosa afecta ao comportamento de moitísimas especies e tamén dana os nosos ritmos circadianos.
A ferramenta Light Pollution Map, que emprega datos recollidos pola NASA e por outros centros de observación do ceo, amosa as zonas cunha maior contaminación deste tipo. Como é lóxico, os centros urbanos adoitan ser eses lugares onde hai unha maior dificultade para a observación das estrelas e doutros fenómenos astronómicos como as choivas de estrelas. É por iso que as zonas de Pontevedra, A Coruña e Vigo móstranse no mapa cunha cor moito máis intensa. Porén, no este das provincias de Lugo e Ourense a contaminación é moito menor, converténdose en espazos moi interesantes dende o punto de vista da observación astronómica. Anímaste a consultar no mapa cal é a contaminación luminosa do teu concello?
