O Consello da Xunta anunciou este xoves a aprobación dun convenio entre as universidades de Santiago, Vigo e A Coruña e a Consellería de Educación, Universidade e Formación Profesional para garantir a contratación temporal do persoal investigador posdoutoral da modalidade A mentres non remate o período de avaliación que, en caso de ser positiva, lles permitiría acceder á modalidade B de bolsas de posdoutoramento que financia o Goberno galego.
Esta medida chega despois de que en xullo deste ano o colectivo beneficiario destas bolsas reclamara unha solución á situación que os deixaba sen contrato e traballo mentres non se resolvía a avaliación. Naquel momento, a Xunta xa anunciara o acordo que se materializa este xoves co convenio.
O convenio coas universidades permitiralles a estas institucións non ter que asumir ningún custo adicional para estes contratos
Mediante esta solución, a Consellería destina un total de de 413.000 euros para que as USC, UDC e UVigo poidan levar a cabo esa contratación sen ningún custo adicional para as propias universidades. Garántese así, segundo o Goberno galego, “que o persoal posdoutoral que finaliza o contrato da modalidade A continúe contratado polas universidades con financiamento da Xunta mentres se realiza o proceso de avaliación”.
No que respecta ás persoas que teñan permiso de maternidade ou paternidade, que tamén reclamaran unha solución á súa problemática particular, Educación garántelles a ampliación do contrato para que se poidan presentar na vindeira convocatoria nas mesmas condicións ca os demais aspirantes.
Segundo a Xunta, deste xeito “dase resposta a unha demanda das propias universidades que reforza a continuidade das liñas de investigación en marcha e a consolidación dunha traxectoria investigadora propia”.
Hai unhas semanas, Santiago acolleu unha xuntanza de tres asociacións de investigadores, durante a cal se presentou o Colectivo de Investigadores/as Posdoutorais de Galicia, xurdido a raíz do problema que se presentou en xullo, e que “aspira a converterse nun interlocutor habitual entre o persoal posdoutoral das universidades galegas e os organismos da Xunta de Galicia encargados de deseñar os programas de captación e retención de investigadores novos”.
