Tres colectivos de investigadores piden melloras na política científica da Xunta

Representantes de científicos pre e posdoutorais e do eido sanitario debaten sobre a súa situación nunha mesa redonda en Santiago

Representantes dun dos colectivos de investigadores posdoutorais.
Representantes dun dos colectivos de investigadores posdoutorais.

Tres colectivos do persoal investigador de Galicia celebran este martes nas instalacións do CiMUS de Santiago de Compostela unha mesa redonda para abordar a situación da carreira científica en Galicia. O Colectivo de Investigadores/as Posdoutorais de Galicia e a Asemblea de Investigadoras de Compostela (AIC), que nos últimos meses se organizaron para reivindicar a mellora das súas condicións laborais por diversos asuntos, reúnense tamén coa Plataforma Galega de Traballadoras/es en Investigación Sanitaria (PLAGTIS) neste encontro.

O debate serve, deste xeito, para presentar ao Colectivo de Investigadores/as Posdoutorais de Galicia, rede formada no pasado mes de xullo a raíz das protestas polas condicións da nova convocatoria de axudas posdoutorais, que reducía o número de axudas correspondentes á Modalidade A de 51 a 46 contratos e prevía deixar no paro durante cinco meses aos máis de trinta investigadores, que na actualidade están inmersos no novo concurso da Modalidade B. Segundo os seus impulsores, o colectivo “aspira a converterse nun interlocutor habitual entre o persoal posdoutoral das universidades galegas e os organismos da Xunta de Galicia encargados de deseñar os programas de captación e retención de investigadores novos”.

A Xunta rectifica e ofrece un contrato temporal aos investigadores posdoutorais

Na xuntanza participan Laura Camino Plaza e Daniel Cao Labora en representación da AIC, Iván Villarmea Álvarez pola banda do colectivo posdoutoral e Adrián Cordido Eijo no nome da PLAGTIS. Os tres colectivos coinciden na súa crítica á política científica da Xunta de Galicia e as universidades galegas, que segundo a súa visión “están caracterizadas pola mercantilización e a precarización da investigación”.

Expoñen que “esta tendencia provoca que as persoas que comezan ou tentan desenvolver aquí a súa carreira investigadora teñan por diante un escenario de contratos escasos, case sempre temporais e normalmente precarios, que dificultan o desenvolvemento das súas respectivas investigacións, así como a conciliación destes traballos coa súa vida persoal e familiar”.

Fronte a isto, os colectivos propoñen “ampliar e redeseñar o modelo de financiamento da investigación en Galicia”, para “artellar unha política científica que asegure máis e mellores oportunidades a curto e medio prazo para as persoas que queiran investigar aquí”.

A precariedade mobiliza á mocidade investigadora da USC

Alén disto, estas agrupacións expoñen que “a longo prazo sería necesario acordar medidas que garantan a profesionalización estable e digna da carreira investigadora e faciliten o tránsito entre as súas distintas fases”. Para isto, abren a porta á creación dun espazo de encontro e de debate onde poder compartir experiencias, problemas e propostas.

Segundo informaron os representantes dos investigadores posdoutorais, teñen previsto reunirse en próximas datas con representantes da Axencia Galega de Innovación (GAIN) e da Subdirección Xeral de Promoción Científica e Tecnolóxica Universitaria para debater varias propostas, como as que atinxen, dunha banda, “á necesidade de fixar un calendario anual estable para as distintas convocatorias de axudas pre e posdoutorais, e doutra, á creación dunha Modalidade C que consolide a traxectoria dos investigadores posdoutorais que xa pasaron polas Modalidades A e B”.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.