A Rede CIGUS acaba de lograr, por vez primeira, a concesión dun proxecto europeo das Accións Marie Sklodowska-Curie (MSCA) COFUND, que permitirá contratar a 40 investigadores posdoutorais para os próximos cinco anos nesta rede de centros de investigación universitarios de excelencia. A proposta contará cun presuposto de máis de 11 millóns de euros, dos que 5,6 millóns son financiados pola Unión Europea e o resto pola Xunta de Galicia co apoio dos centros da rede.
Este proxecto, baixo o nome de TALENTGAL, supón “un novo fito para a nosa I+G+i”, sinala o conselleiro de Educación, Ciencia, Universidades e FP, Román Rodríguez. “Isto posibilitará que, ademais, contratemos a 40 profesionais que xa son doutores para que leven a cabo labores de investigación en áreas especializadas nos centros máis prestixiosos das nosas universidades públicas“, engade o representante autonómico.
Un pulo á carreira investigadora
Presentado pola Xunta en colaboración coas tres universidades públicas galegas, a Rede CIGUS e FEUGA, impulsa o desenvolvemento da carreira investigadora e promove a integridade científica, a transferencia de coñecemento e o emprendemento.
Os novos investigadores que se incorporen aos centros CIGUS poderán centrar as súas investigacións en áreas clave para Galicia, como a biotecnoloxía, medicina, química, nanomateriais, TIC, enxeñaría ambiental, ciencias mariñas e físicas, entre outras.
Formación complementaria
Máis aló das súas investigacións, os 40 posdoutorais que se sumen á Rede CIGUS recibirán formación complementaria en competencias transversais, e apoio e mentoría personalizados.
O obxectivo é fomentar oportunidades de colaboración industrial, mobilidade intersectorial e interacción con públicos máis amplos, contribuíndo a mellorar as súas perspectivas de carreira. Ademais, terán estancias obrigatorias en institucións académicas, empresas e administracións públicas, o que permitirá ampliar aínda máis as súas oportunidades profesionais.
Este programa conta, ademais, co apoio dunha ampla rede de máis de 40 socios de distintos sectores, áreas científicas e países, que inclúen institucións académicas e universidades, líderes industriais, pymes, infraestruturas de investigación e centros tecnolóxicos.
