A alga asiática invasora Rugulopteryx okamurae apareceu por primeira vez en Galicia no verán de 2024. En concreto, nalgunhas zonas da costa da Coruña. Agora, a Universidade de Santiago (USC) e a Consellería do Mar poñen en marcha un proxecto para avaliar a distribución da agresiva especie, que causa graves impactos ambientais. O obxectivo é proporcionar ferramentas que permitan coñecer de maneira rápida e práctica como se espalla a alga polas costas galegas.
A través do acordo para a realización do proxecto ALGASDET, de máis de 200.000 euros e un prazo de execución de tres anos, implementarase unha ferramenta para facilitar a detección de Rugulopteryx okamurae estudando o ADN de mostras ambientais (auga, sedimento). Ademais, crearase unha base de datos de secuencias de ADN, determinarase o mellor fragmento do ADN para detectar Rugulopteryx okamurae, analizarase a sensibilidade do método e avaliarase a distribución actual da invasora en Galicia. A ferramenta será transferida ás institucións encargadas de monitorizar as costas galegas.
Tal e como explican as coordinadoras do proxecto ALGASDET (Novas ferramentas para detectar a alga invasora Rugulopteryx okamurae mediante ADN ambiental): “Urxe coñecer a súa distribución en Galicia, pero detectala é difícil polo seu parecido a unha alga nativa e porque crece maioritariamente no submareal”.
Informar o sector pesqueiro
Ademais de coñecer a evolución actual desta especie no territorio, con este acordo búscase informar o sector pesqueiro sobre este novo problema para tentar que a especie non se expanda por toda a costa galega a curto prazo debido ao descoñecemento dos riscos inherentes ás actividades pesqueiras. Para iso, impartiranse charlas e obradoiros para sensibilizar non só o sector senón tamén a sociedade sobre a problemática relacionada con Rugulopteryx okamurae, e para ensinar como recoñecer a invasora.
As actuacións realizaranse en colaboración coa Universidade da Coruña, a Federación Galega de Confrarías de Pescadores, e as Confrarías de pescadores da Coruña, de San José (Cangas) e a ‘La Anunciada’ (Baiona).
