Agora mesmo, un voo de Ryanair co código RYR72SC, procedente da cidade de Faro, no sur de Portugal, diríxese cara ao aeroporto de Stansted, en Londres. Esta información pódese coñecer grazas á páxina web Objective Nuclear, que alberga un proxecto chamado Air Loom, un rastreador de voos e visualizador de espazo aéreo en 3D. Combinado con FlightRadar24, o usuario pode acceder a datos detallados sobre todos os voos que sobrevoan a súa cidade en tempo real.
A diferenza dos radares convencionais, esta ferramenta emprega datos ADS-B en tempo real para proxectar as traxectorias dos avións nunha contorna tridimensional sobre mapas satelitais. Deste xeito, permite consultar información como a altitude, os patróns de espera ou a maneira en que as aeronaves entran e saen dos aeroportos, algo especialmente complexo de coñecer nestes momentos pola chegada da borrasca Joseph á comunidade.
A plataforma, ademais de amosar os traxectos, ofrece dúas funcións principais: por unha banda, a opción de seguir un avión durante todo o seu percorrido (Flight Following); pola outra, o Surf Mode, que permite cambiar automaticamente a outro voo cando o que se está a seguir aterra.
Galicia e illas británicas
Son sete os voos que no momento de elaborar esta información trazan a súa traxectoria sobre o ceo galego, aínda que só dous deles teñen como destino un aeroporto da comunidade. Por unha banda, un voo Madrid – Vigo da compañía Air Europa, que xa aterrou en Peinador; pola outra, un voo de Vueling procedente de Barcelona, con chegada ao Aeroporto Rosalía de Castro de Santiago de Compostela.
Con todo, son as illas británicas as que concentran o maior fluxo sobre Galicia. Ademais do voo RYR72SC, dous traxectos máis da compañía low cost Ryanair conectan Portugal con Inglaterra: un de Oporto a Birmingham e outro de Faro a Manchester. A estes súmase un voo da aeroliña Air Lingus, que traslada pasaxeiros dende Dublín ata Lanzarote, atravesando o interior de Galicia.
Non obstante, non sempre é posible obter información completa de todos os voos, especialmente cando se trata de jets. É o caso do voo N203JE, un Bombardier Global 7500 con matrícula estadounidense, considerado un jet executivo de longo alcance. No momento da consulta, voaba a unha altitude de 19.325 pés (5,6 km), a unha velocidade de 713 km/h e cunha orientación de 175o, o que indica un rumbo case cara ao sur. Esta é a información á que se pode acceder grazas á ferramenta Air Loom, mesmo sen necesidade de complementar os datos con plataformas como FlightRadar24.
Podes consultar Air Loom de Objective Unclear na seguinte ligazón.
Hai un erro no nome da páxina web: o nome correcto é “Objective Unclear” https://objectiveunclear.com/airloom.html. Non “Objective Nuclear”