É moi habitual que os avións que surcan os ceos aproveiten as condicións meteorolóxicas para reducir o seu tempo de voo. As correntes que se forman na atmosfera ocasionan, de cando en vez, que cheguen tempo antes do previsto porque as aeronaves son empurradas pola corrente en chorro. É o que aconteceu cun voo de British Airways entre Nova York e Londres, que este 9 de febreiro estableceu un novo récord de velocidade subsónico ao cruzar o Atlántico en 4 horas e 56 minutos grazas ás condicións xeradas por Ciara, unha potente borrasca que afecta estes días ás illas británicas e que mesmo se está deixando notar na costa galega.
O voo BA112 empurrado por Ciara superou o récord anterior dun avión noruegués, que fixera o percorrido entre Nova York e o aeroporto londinense de Gatwick en 5 horas e 13 minutos. Coma el, centos de avións sumáronse á corrente que sopraba en dirección leste para acelerar e, ao tempo, aforrar combustible. Ao mesmo tempo, os avións que se tiñan que dirixir a Norteamérica viaxaban ao norte da corrente en chorro para evitar o freo que supoñían estes refachos no seu avance cara ao oeste. Así, mentres o avión de British Airways batía récords, outros voos tardaban ata unha hora máis do habitual en completar a viaxe.
Thanks to a strong, well-positioned jet stream, a @British_Airways 747 managed a new New York-London subsonic speed record today, making the journey in 4 hours 56 minutes—17 minutes faster than the previous record. https://t.co/HISXpN6Vns #BA112 pic.twitter.com/A2R42rsx14
— Flightradar24 (@flightradar24) February 9, 2020
Tal e como explican no blog do portal de información aérea Flightradar24, a velocidade que amosa cada un dos voos reflectidos nesta páxina web é a velocidade respecto ao terreo, uns datos que se reciben da aeronave a través do sistema ADS-B. Porén, algúns voos transmiten varias velocidades, relativas á velocidade aérea, a velocidade real e o valor de Mach (a relación entre a velocidade dun corpo nun determinado medio e a velocidade do son nese medio nas mesmas condicións). Durante a súa viaxe impulsado por Ciara, o voo BA112 acadou un Mach 0,86.
Aviso laranxa por Ciara
A propia borrasca está a provocar numerosos problemas en Irlanda e o Reino Unido, con voos cancelados e incidencias por ondas, vento e chuvia. A situación chega a notarse na costa atlántica e cantábrica do norte da península ibérica, onde está activado ata o martes un aviso de nivel laranxa por ondas que poderían chegar aos sete metros.
Bos días! Aínda hoxe impresiona a dimensión da #StormCiara no Atlántico. Onte rozaba #Galicia e aínda así provocaba ventadas superiores a 100 km/h no litoral norte. Hoxe continúa movéndose cara ao norte. O vento irá a menos, pero as ondas continuarán superando os 5 m no litoral⚠️ pic.twitter.com/eJaDUZ5UGh
— MeteoGalicia (@MeteoGalicia) February 10, 2020
