A comunidade galega comeza a semana acompañada polos raios: MeteoGalicia rexistrou 5.300 nas últimas 24 horas, dos cales 2.186 se produciron en terra. Unha ferramenta de observación da Aemet permite sinalar que o intervalo temporal de maior intensidade se produciu entre as 20:00 horas do domingo 23 e as 01:00 horas da madrugada do luns.
A semana amence cunha actividade eléctrica moito menor que a que se produciu durante a xornada anterior. Así e todo, os catro detectores de raios cos que conta MeteoGalicia —un en cada provincia— captaron os derradeiros nos últimos momentos da noite: houbo 45 entre as 5:00 e as 6:00 horas, 50 entre as 6:00 e as 7:00 horas, 83 entre as 7:00 e as 8:00 horas, catro entre as 8:00 e as 9:00 horas e, finalmente, tres na hora seguinte
Segundo o mapa que ofrece MeteoGalicia, as zonas nas que se rexistrou máis actividade foron as metades occidentais da Coruña e Pontevedra, a franxa de norte a sur entre os municipios lucenses de Muras e Sarria, unha segunda traxectoria de norte a sur entre o suroeste de Lugo e a metade oeste de Ourense, e algúns puntos do interior ourensán polas áreas de Maceda, Vilar de Barrio e Laza.
