Galicia está a vivir un episodio prolongado de chuvias persistentes, provocadas por un tren de borrascas que acumula ata 300 l/m2. Dende o 23 de xaneiro, unha sucesión de zonas de baixas presións visitou a comunidade con diferentes nomes: primeiro Ingrid, despois Joseph e, aínda que non chegou a territorio galego, a veciña Portugal sufriu os danos da borrasca Kristin. Pero a próxima podería chamarse Laura ou Uxía. A iniciativa Aktion Wetterpate, traducida ao galego como “Campaña de Padriños do Tempo”, permite a particulares e empresas bautizar co seu nome tanto anticiclóns como borrascas que afectan a Europa. Iso si, pórlle nome ao tempo ten un custo: 390€ para os anticiclóns e 290€ para as borrascas. Os primeiros son máis caros porque adoitan durar máis tempo, e polo tanto o nome permanece nos mapas máis días.
Hai, con todo, unha regra a seguir: existe un sistema de rotación anual. Nos anos pares, como 2026, os anticiclóns levan nomes masculinos e as borrascas nomes femininos; nos anos impares ocorre o contrario. Segundo esta norma, debes descargar un formulario na páxina da campaña, asinalo e envialo polas canles correspondentes. Unha vez asignado o nome, aparecerá nos mapas meteorolóxicos oficiais do Instituto de Meteoroloxía da Universidade Libre de Berlín, que asigna os centros de presión dende 1954 e é a fonte principal dos medios de comunicación en Alemaña e outros países europeos. Así, é moi probable que o teu nome apareza locutado na radio ou nun titular de prensa.
O principal obxectivo deste pagameneto é recadar fondos para manter a observación meteorolóxica estudiantil na estación de Berlín-Dahlen para que os estudantes continúen a realizar medicións manuais e mantendo a tradición da Berliner Wetterkarte. É unha das poucas estacións que mantén a observación humana combinada coa tecnoloxía moderna. Orixinalmente, eran os meteorólogos quen elixían os nomes. Non obstante, en 2002, debido a recortes financeiros, lanzouse a campaña Aktion Wetterpate para que calquera cidadán puidera patrocinar o seu nome e así salvar a estación. Agora que se achega San Valentín, poñerlle nome a unha borrasca podería ser un agasallo orixinal. Non sei, pénsao.
Podes consultar os prezos de Aktion Wetterpate na seguinte ligazón.
