O acceso a redes sociais estará prohibido en España para os menores de 16 anos. Así o anunciou este martes o presidente do Goberno, Pedro Sánchez, durante unha intervención no World Governments Summit que se está a celebrar en Dubái. Esta medida obrigaría os xigantes tecnolóxicos a implementar sistemas efectivos para verificar a idade dos usuarios co obxectivo de crear unha contorna dixital máis segura, sobre todo para a infancia e a adolescencia.
“É absolutamente positivo e necesario, pero non suficiente. Hai que poñerlle coto á industria tecnolóxica, pero tamén hai que traballar coas familias, coa rapazada e co sistema educativo”, valora Antonio Rial Boubeta, profesor de Psicoloxía da Universidade de Santiago (USC) e autor dun dos informes máis exhaustivos sobre infancia e adolescencia na contorna dixital. O experto cre que este primeiro paso é un “exercicio de responsabilidade” que en ningún caso se debería interpretar como un condicionante das liberdades individuais, senón como unha oportunidade para protexer os menores. A este respecto indica que as sancións non recaerán sobre os usuarios, senón sobre as grandes tecnolóxicas que incumpran a lei.
Responsabilidade compartida
Rial Boubeta cre que é prudente esperar para analizar que medidas materializarán a prohibición, pero considera que é un primeiro paso esperanzador. Sobre todo, tendo en conta o impacto que Internet en xeral e as redes sociais en particular teñen en etapas clave da vida como a infancia e a adolescencia. “O acceso cada vez máis temperán, frecuente e intenso non é inocuo. Ten unha pegada moi importante na saúde, na convivencia, nos hábitos de vida e, en particular, na saúde mental”, advirte o psicólogo. Segundo o estudo publicado con UNICEF España, case o 80% do alumnado de quinto e sexto de primaria usa masivamente as redes sociais.
Ademais da responsabilidade das administracións, que se materializa hoxe coa medida anunciada por Sánchez, Rial Boubeta fai un chamamento aos pais e ás escolas: “Temos que tomar partido e acompañalos activamente. Estámolos deixando sós na contorna dixital a costa da súa saúde”. A este respecto, critica os adultos que soben fotos de menores a redes sociais polos riscos que supón para o futuro dos cativos. “Temos que poñer os cimentos. Se non, cando cheguen á adolescencia, que non é o momento de máximo autocontrol, non se van resistir ás redes”, alerta.
Factura mental
Entre o riscos dun uso frecuente e intensivo das redes sociais por parte dos menores, está o acceso á pornografía, pero tamén a unha longa lista de contidos ilícitos. “O perigo máis importante é que as redes sociais teñen unha capacidade moduladora brutal dos pensamentos, dos desexos, das emocións, da autoestima e do desenvolvemento persoal. Nesta etapa está todo en xogo; incluso o tipo de persoa na que se van converter”, apunta. De feito, relaciona algúns datos co uso intenso e frecuente de redes sociais durante a infancia e a adolescencia: un 10% dos menores teñen ideacións suicidas e entre un 6% e un 7% intentou suicidarse nalgún momento.
“O desamparo emocional que senten algúns nenos é brutal. Isto vén explicado en boa medida polas redes sociais, que minan a súa saúde mental. Refúxianse nunha contorna que amosa modelos nocivos”, sostén Rial Boubeta. Non obstante, sinala que non se debe demonizar o uso das redes sociais, dado que o dixital está integrado por completo na vida diaria de nenos, adolescentes e adultos. O que se precisan son máis normas e máis educación para saber como usalas e, así, reducir ao máximo os riscos derivados dun consumo intenso, masivo e frecuente.
E cRueda de Vil opinará igual cá triabortada da Ayusa…