Nova reviravolta comercial de Estrella Galicia e o seu departamento de I+D. A cervexeira lanzará o vindeiro 28 de novembro na súa web unha nova cervexa, esta vez baseada en castañas. É a cuarta edición do seu proxecto “Fábrica de Cervexas”, que en anteriores ocasións xa lanzou ao mercado bebidas baseadas en Pementos de Padrón, Percebes do Roncudo e Cabaza e Vainilla. En todos os casos, esgotáronse en cuestión de horas.
Segundo informa a empresa, haberá unha edición limitada a 8.000 litros que se venderá desde estes mesmos días en establecementos seleccionados, e a partir do 28 poderase encargar tamén na web da marca.
Estrella Galicia decantouse polas castañas, “un produto de temporada que evoca o outono e a época dos magostos. Segundo explica Luis Alvar, un dos mestres cervexeiros da empresa, “o ingrediente é un clásico desta estación, que usamos nas dúas fases do proceso de elaboración da cervexa para obter toda a súa esencia: durante a elaboración do mosto e na etapa de maduración”, explica Alvar. O experto engade que “o resultado é que tanto o sabor como o aroma da castaña queda perfectamente integrado nas características propias do noso estilo de cervexas”.
Respecto ao sabor, Estrella Galicia sinala que é “unha creación doce e sedosa, con agradables notas afumadas, florais e acarameladas ao entrar na boca. O seu aroma a froitos secos e castañas acádase grazas á incorporación do froito en todas as fases do proceso, co obxectivo de intensificar a súa achega sensorial”.
Nos últimos anos, o traballo de investigación, desenvolvemento e innovación da cervexeira foi distinguido por diversos colectivos científicos, como o Colexio Oficial de Biólogos de Galicia.
