Un estudo galego sobre prevención da violencia de xénero a través de medios dixitais apunta a que un 27% dos adolescentes foron vítimas de ciberacoso. É un dos datos presentados pola Universidade de Vigo (UVigo) que fala sobre os riscos de acoso sexual nas redes, tras entrevistar a 666 mozos de entre 14 e 18 anos.
O documento detecta diversos comportamentos perigosos. Entre eles, o risco dos mozos ao acoso e á explotación sexual en contornas dixitais. Preto do 35% dos participantes presentaron condutas de grooming, e o 14,7% afirmaron ter practicado sexting —intercambio de imaxes ou vídeos cun contido sexual explícito—. En todos os casos, trátase de problemáticas cunha maior incidencia nas rapazas. “Pon de manifesto a necesidade de abordar estes riscos desde unha perspectiva de xénero nas estratexias de prevención e sensibilización”, di Manuel Isorna, un dos investigadores do estudo.
Un 16% presenta risco de adicción ás redes
Os resultados acadados sinalan varios outros aspectos en certa medida preocupantes, segundo os expertos. O 15,8% dos adolescentes presentaban, segundo os académicos, un risco de adicción ás redes. Neste ámbito non se atoparon diferenzas significativas en función do xénero. Estes resultados, subliña Isorna, “suxiren unha falta de control no uso das tecnoloxías dixitais e unha posible interferencia no seu benestar psicolóxico e académico”.
Si rexistraron diferenzas entre mozos e mozas no referido ao consumo de pornografía a través da rede. Fíxoo máis do 50% da mostra e, en máis do 69% dos casos, foron os varóns os que accederon a este tipo de contidos.
En termos globais, preto do 91% dos participantes comezaron a empregar as redes sociais antes do 14 anos. Instagram e Whatsapp foron as primeiras plataformas empregadas, nun 42% e o 35% dos casos, respectivamente.
Machismo nas redes
O equipo investigador afirma que unha porcentaxe considerable dos adolescentes presentan condutas de risco relacionadas do uso de Internet e das redes sociais. Entre estas, hai síntomas de adicción, cun uso excesivo destas tecnoloxías ou medo a estar sen móbil (nomofobia).
Por outra banda, o estudo pon de relevo que os resultados indican tamén que as crenzas sexistas, tanto hostís como benévolas, están presentes na poboación adolescente. Hai diferenzas significativas en función do xénero, xa que estas teñen unha presenza notablemente máis alta entre os rapaces. “Estes achados subliñan a persistencia de desigualdades de xénero e actitudes discriminatorias”, subliña Isorna. Para este, implica que perpetúan estereotipos nocivos e poden incrementar a exposición a riscos na contorna dixital.
Os resultados desta investigación resaltan, segundo Isorna, a urxencia de desenvolver programas educativos e de intervención dirixidos a adolescentes, familias e centros escolares. Tamén é importante, segundo o estudo, que estes inclúan a perspectiva de xénero.
Podes ler a noticia do DUVI nesta ligazón.
