Nova funcionalidade en Instagram. Chámase ‘Instantáneas’ e a través dela poderás mandar unha imaxe sen editar aos teus amigos. A aplicación permite enviar estas fotografías tanto a coñecidos como a grupos e terán un límite de tempo: 24 horas. Ademais, só permitirá unha visualización por persoa.
Esta nova posibilidade estará oculta na sección das mensaxes privadas, xusto ao carón da función de ‘Notas’. É por isto que non molesta demasiado, aínda que pode pasar desapercibido para algúns usuarios desta popular plataforma. Só tes que deslizar de esquerda a dereita na parte onde se atopan as notas, e xa poderás acceder a esta sección que, ademais, permite unha primeira proba sen consecuencias.
Unha das particularidades é que as fotografías non se poden editar. Non ten a posibilidade de, por exemplo, aplicar filtros ou de incluír calquera modificación. A intención é que sexa unha instantánea exacta e real de cara a compartir a túa visión ou experiencia da forma máis literal posible.
A aplicación permite mandar estas fotos entre persoas que se sigan mutuamente. Iso si, esta función está pensada para mandar a amigos concretos ou pequenos grupos. Por iso, cando realices a instantánea poderás elixir a quen queres enviala (e aparecerán diversas opcións, incluída a de mellores amigos). Isto inclúe a posibilidade de silenciar os usuarios que non queremos que as vexan en ningún caso.
Manter un rexistro
Unha diferenza importante cunha mensaxe dunha soa vez que, por exemplo, poida mandarse por WhatsApp, é que terá un historial. É dicir, que a persoa que comparte a fotografía poderá ver, durante 30 días, cales foron as imaxes que se mandaron por este sistema. Ademais, permite descargalas ou, tamén, eliminalas.
As instantáneas de Instagram son, en realidade, unha función a medio camiño entre unha historia e unha foto dunha única visualización. Aínda así, ten algunhas características únicas, como a imposibilidade de poder editalas. Tamén ten moito parecido coa idea que desenvolveu BeReal, na que tampouco podes modificar as imaxes e son visibles só durante un tempo determinado.
