Tres meses despois de que se lanzara unha alarma sanitaria sobre o repetino aumento de casos de hepatite aguda infantil, a causa continúa a ser descoñecida. E, se ben as cifras comezan a diminuír, os autores do último informe do Centro Europeo para a Prevención e o Control de Enfermidades (ECDC) prefiren manter a cautela: “A hepatite grave pode tardar un tempo en desenvolverse despois dos síntomas iniciais e dado que é necesario realizar investigacións para descartar as causas coñecidas é de esperar que haxa un retraso na notificación. A diminución dos casos é difícil de interpretar”.
En Galicia, segundo notificou a Consellería de Sanidade, dende o 1 de xaneiro de 2022 identificáronse cinco casos, catro na área sanitaria de Vigo e un na Coruña, e todos eles evolucionaron positivamente. Ademais, dende principios de maio non se detectou ningún novo caso.
Situación global
Os datos recollidos ata o 30 de xuño sinalan un total de 473 casos de hepatite aguda infantil de orixe descoñecida en máis de 20 países. Reino Unido está en cabeza, con 268 afectados; España en segundo lugar, con 40, e Italia, con 35, no terceiro posto. O resto de estados non superan a vintena de pacientes. Federico Martinón Torres, xefe de servizo de Pediatría no Hospital de Santiago, atribúe este elevado número de casos en España á busca activa. “Ademais, todos eles foron menos graves”.
O adenovirus 41 é a principal hipótese que manteñen os expertos
Pola posible relación da hepatite con outras infeccións, 364 pacientes foron sometidos a probas de adenovirus, sendo positivos o 52,7% deles. Así, Martinón sinala: “Os casos detectados globalmente reducíronse progresivamente sen motivo aparente. Non se identificou a causa, pero a principal hipótese segue a ser o adenovirus 41“.
Precisamente, esta foi unha das primeiras causas en saltar á palestra, posto que os pacientes pediátricos son máis sensibles a este tipo de patóxenos, comúns en seres humanos. Non obstante, non remataba de convencer os expertos posto que non é habitual que produza hepatites, polo que apuntaban cara a unha causa multifactorial na que si estivera implicado este xerme.
Da mesma forma, para non descartar ningunha posibilidade tamén se lles realizaron PCR para a covid a 322 pacientes, dos cales foron positivos o 10,9%. Neste caso tamén se analizou a seroloxía en 61 dos casos, resultando que o 63,9% dos enfermos tiña anticorpos para a covid; e a vacinación en 113 casos, dos cales o 85,8% non estaba vacinado.
Clínica
A pesar de que o informe do ECDC recolle os casos de hepatite de orixe descoñecida en rapaces de 16 anos ou menos, o 76,1% dos enfermos teñen cinco anos ou menos. A maioría deles presentaban a sintomatoloxía típica de hepatite aguda, de tipo gastrointestinal e con ictericia, pero todas as causas habituais eran descartadas —virus que causan hepatite A, B, C ou E; virus respiratorios ou medicamentos—.
Por outra banda, o ECDC só dispón dos datos de 295 pacientes. Entre eles, o 29,5% requiriu ingresar nunha unidade de coidados intensivos pola gravidade da súa situación e o 8,3% tivo que ser sometido a un transplante de fígado.
