A xefa de Psiquiatría da Área Sanitaria de Vigo, Marta López, vén de doutorarse con sobresaínte cum laude pola Universidade de Vigo pola teses titulada “Eficacia e seguridade do tratamento con Litio en pacientes infectados por SARS-CoV-2”. A investigación, dirixida polo psiquiatra José Manuel Olivares e a doutora Tania Rivera, centrouse no estudo do litio como posible axente inmunomodulador e neuroprotector en pacientes con covid-19. Esta liña xurdiu durante a primeira onda da pandemia, a partir da práctica clínica directa e da evidencia previa existente sobre as propiedades antivirais e inmunolóxicas do fármaco.
O traballo aborda desde os primeiros casos clínicos tratados en pacientes hospitalizados graves ata o desenvolvemento posterior dun ensaio clínico, analizando parámetros inflamatorios, inmunolóxicos e evolución clínica. No estudo participaron distintos servizos e profesionais da Área Sanitaria de Vigo, especialmente os equipos de UCI, Medicina Interna, Pneumoloxía, Laboratorio e Psiquiatría, reflectindo o traballo transversal e multidisciplinar desenvolvido durante a pandemia.
Ademais, a tese reflexiona sobre a relación entre neuroinflamación, inmunomodulación e psiquiatría, integrando a experiencia clínica vivida durante a pandemia cunha visión máis transversal da medicina e da investigación clínica.
Principais conclusións
O carbonato de litio é un fármaco de uso exclusivo baixo prescrición médica que se emprega desde hai máis 70 anos en distintos cadros psiquiátricos, como o trastorno bipolar, depresión resistente ou determinados casos de irritabilidade e axitación. Con todo, dende hai un tempo coñécese tamén a súa capacidade de inhibir a replicación de varios tipos de virus, algúns deles similares ao do SARS-CoV-2. Outra das súas propiedades é a capacidade para aumentar a resposta inmunolóxica, incrementando os niveis de linfocitos; así como a de previr e diminuír a actividade inflamatoria, a problemática principal nos pacientes máis graves, levándoos mesmo á morte.
Segundo explica a doutora Marta López, “as principais conclusións do estudo apuntan a que o litio podería ter un posible papel inmunomodulador e neuroprotector, observándose cambios en distintos biomarcadores inflamatorios e inmunolóxicos nos pacientes tratados”. Desta forma, os resultados abren novas liñas de investigación neste campo, aínda que a investigadora sinala que serán necesarios estudos máis amplos para poder confirmar os achados.
