Galicia produce un novo radiofármaco que permitirá facilitar o diagnóstico de precisión do cancro de próstata avanzado. Durante o mes de agosto e os primeiros días de setembro xa se puideron subministrar as primeiras doses e, a finais deste mes a unidade galega estará en condicións de abastecer de xeito regular a todos os hospitais do Servizo Galego de Saúde.
As instalacións son as mesmas desde as que se elaboran e distribúen baixo demanda monodoses de radiofármacos para os oito servizos de medicina nuclear dos hospitais galegos. Ademais, tamén se xestionan os residuos que producen. A unidade foi optimizando o seu rendemento ata chegar a producir máis de 32.500 doses no pasado ano, o que supuxo distribuír de media 130 radiofármacos para diagnóstico avanzado nos hospitais galegos, segundo a Xunta.
A produción destes radiofármacos ten un impacto importante no sistema sanitario, posto que permite diagnósticos máis temperáns e precisos. Especialmente en pacientes con tumores, patoloxías cardíacas e enfermidades neurodexenerativas como o alzhéimer.
Unha produción centralizada
“Todo este traballo non sería posible sen o labor realizado polos técnicos e radiofarmacéuticos desta unidade”, destacou o conselleiro de Sanidade, Antonio Gómez Caamaño, que anunciou a nova produción. O titular da carteira sanitaria incidiu en que contar cun centro unificado supuxo homoxeneizar a produción e multiplicar as garantías de seguridade na elaboración de compostos radioactivos que antes se producían en cada hospital, o que aumentaba a variabilidade nos procedementos.
Desde a Xunta destacan que ao ter unha produción centralizada, baixan os custos e garántese un acceso igualitario para todos os pacientes da rede pública de hospitais. A Unidade Central de Radiofarmacia de Galicia é o único provedor centralizado de radiofármacos convencionais para o Sergas. Esta central prepara, practicamente a medida, preto de 40 tipos diferentes, en monodoses personalizadas segundo o paciente e a patoloxía.
Na súa visita, Gómez Caamaño dixo que esta unidade erixiuse, nos seus 25 anos de historia, como un referente nacional na produción de doses de radiofármacos. Concretamente, o conselleiro destacou a súa importancia para exploracións diagnósticas e terapéuticas avanzadas e que, ademais, ten un enorme valor clínico no campo da medicina nuclear.
