As consecuencias dos incendios do verán de 2025 aínda se notan hoxe. Co obxectivo de ampliar os mecanismos de detección temperá, nace unha nova aplicación móbil de ciencia cidadá para facilitar o aviso dos conatos e lumes. Promovida pola Xunta de Galicia, o obxectivo é que estea dispoñible no mes de xullo, no inicio da campaña de risco, segundo sinalaba o presidente Alfonso Rueda. Esta é unha das principais novidades da actualización deste ano do Plan de prevención e defensa contra os incendios forestais de Galicia (Pladiga), que se presentará este próximo venres no Consello Forestal.
A través desta ferramenta búscase ampliar a rede colaborativa de vixilancia e prevención de incendios, unha liña estratéxica do Pladiga 2026, favorecendo que a cidadanía forme parte activa do sistema de alertas e complementando deste xeito a cooperación telefónica a través do 085 e o 112. Con tan só tres pulsacións, o usuario poderá alertar da presenza de calquera incendio forestal, facilitando os datos de xeolocalización, e achegando as coordenadas do punto aproximado e a súa situación sobre o mapa físico ou foto aérea. Ofrecerase tamén a posibilidade de realizar unha fotografía ou vídeo, engadir notas de voz e achegar observacións relevantes. As alertas recibiranse nos centros de coordinación provincial da Xunta.
Tamén no eido tecnolóxico, este ano ampliarase “nun 30% da rede de videovixilancia”, que chegará a un total de 241 cámaras en 111 puntos distribuídos por todo o territorio galego. Así, na aplicación de xestión interna de incendios XeoCode despregarase un sistema de intelixencia artificial (IA) que permitirá a detección automática e inmediata de fume e focos iniciais do incendio. A IA incorporada alertará de xeito automático tras un filtrado, para posteriormente comprobar o aviso de xeito manual por parte dos técnicos e iniciar o operativo.
