“O Pazo de Fonseca acollerá a exposición Camelia, flor de Galicia do 2 ao 4 de abril, reforzando a proposta turística de Santiago de Compostela durante a Semana Santa”. Así o anunciou o director de Turismo de Galicia, Xosé Merelles durante a presentación da mostra que, ademais de consolidar este recurso como singular e identitario de Galicia, contribuirá nesta ocasión “a enriquecer a experiencia dos visitantes e a reforzar o posicionamento da cidade como destino de referencia”.
A mostra, que terá lugar no Claustro do Pazo de Fonseca con acceso libre, combina a tradición botánica da camelia con elementos representativos do traxe galego. Máis de 200 variedades desta flor emblemática poderán contemplarse nunha coidada montaxe escenográfica que incorpora, como novidade este ano, instalacións audiovisuais para enriquecer a experiencia do visitante.
Esta iniciativa lévase a cabo xunto á coordinación da Sociedade Española da Camelia e a Universidade de Santiago de Compostela. Contará coa participación de 25 coleccionistas e entidades, entre as que se atopan asociacións e institucións de referencia no ámbito da camelia, consolidando así o carácter especializado e de calidade da proposta.
Turismo sostible
Durante a súa intervención, Xosé Merelles destacou que esta proposta sumarase á oferta cultural da cidade xerando contido adicional aos actos propios da Semana Santa en Santiago, dando a coñecer un produto turístico singular de Galicia xunto as outras propostas ao redor desta flor como é a Ruta da Camelia en Flor, parte dos itinerarios dos Trens Turísticos de Galicia.
Trátase dunha ferramenta para fomentar un modelo turístico máis sostible e desestacionalizado. Esta ruta inclúe actualmente 19 espazos singulares entre xardíns e recursos asociados da comunidade. Combínase con actividades complementarias vinculadas coa enogastronomía, o turismo de natureza e o patrimonio arquitectónico.
