O érbedo de Cabeiro, o plataneiro de sombra do pazo de San Isidro, o Loureiro dos Poetas da Casa de Rosalía… Hoxe publicouse a actualización do Catálogo galego de árbores senlleiras. Unha listaxe que inclúe exemplares de árbores e plantas que, segundo as valoracións da Xunta, merecen unha maior protección.
Dous dos máis destacados son os exemplares localizados na Casa-Museo de Rosalía de Castro. Unha camelia (Camellia reticulata Lindl x Camellia japonica) e o coñecido como Loureiro dos Poetas (Laurus nobilis). Este é unha das árbores máis salientables do Xardín de Rosalía e foi coetáneo coa estancia da escritora en Padrón. Ambos foron incorporados á lista pola súa significación histórica e cultural.
No caso do concello de Pontevedra, inclúese no Catálogo unha formación de tres exemplares de azaroleiras (Crataegus azarolus) da Estación Fitopatolóxica de Areeiro, en Lourizán. Destacan polo seu porte, dendometría, idade e rareza, así como pola súa significación cultural, educativa e estética.
Dúas mortes e unha expulsión
A maiores, inclúese no Catálogo galego de árbores senlleiras un érbedo, localizado en San Xoán de Cabeiro, no Concello de Redondela, que é un exemplar de Arbutus unedo L que salienta pola súa dendrometría, idade e porte. O mesmo motivo para o plataneiro de sombra (Platanus hispanica Mill. ex Münchh), que se localiza no Pazo de San Isidro, no Concello de Mondoñedo e que mide máis de 35 metros e que puido ser plantado entre 200 e 300 anos atrás.
Fóra quedan o carballo do pazo de Vilardefrancos e o cocoteiro de Chile do pazo de Meirás tras as súas mortes. Tamén a faia do pazo de Castrelos, por considerar que perdeu os valores que motivaron a súa inclusión.
Ata 204 exemplares
O Catálogo galego de árbores senlleiras é unha ferramenta pública e en constante actualización. Poden propoñer a inclusión de elementos novos os seus propietarios, as administracións, os centros de investigación ou as asociacións e entidades públicas ou privadas que teñan entre os seus fins a protección da natureza. Neste, son susceptibles de incluírse todas aquelas árbores e formacións merecentes de protección en atención ás excepcionais características do seu porte, proporcións, idade, rareza, significación histórica ou cultural, interese científico, educativo, estético ou paisaxístico.
Na actualidade, o Catálogo galego de árbores senlleiras suma xa un total de 204 elementos (156 exemplares e 48 formacións arbóreas) pertencentes a 84 especies diferentes. 57 exemplares están na provincia da Coruña, 43 en Lugo, 28 en Ourense e 76 en Pontevedra.
