Dende o 31 de marzo, os hórreos galegos xa son recoñecidos como Manifestación Representativa do Patrimonio Cultural Inmaterial, xunto cos existentes en Asturias, León, Cantabria e o País Vasco. O Consello de Ministros aprobou este martes o Real Decreto, por proposta do ministro de Cultura, Ernest Urtasun, polo que se recoñecen estas estruturas como vehículos de transmisión e expresión simbólica de identidade.
O obxectivo desta declaración é garantir esta dimensión inmaterial, incorporándoa de maneira explícita aos procesos de identificación, documentación, estudo e difusión deste patrimonio, reforzando así o seu recoñecemento e transmisión interxeracional, segundo sinala o Goberno.
Os hórreos son construcións de arquitectura popular deseñadas para gardar as colleitas e os alimentos, protexéndoos de roedores e outras alimarias. A súa principal característica é que se erguen sobre pés dereitos que os illan do chan, favorecendo a ventilación interior e impedindo o acceso dos animais. Con todo, máis aló da súa dimensión material, posúen tamén un importante valor simbólico e social como depósito de memoria e espazos cargados de prácticas, relatos e modos de vida tradicionais.
