Impulsar un modelo sanitario máis eficiente e centrado no paciente, co reforzo da cooperación entre Galicia e o norte de Portugal en ámbitos clave como a medicina personalizada, a dixitalización da saúde e a integración de datos clínicos é o propósito do proxecto europeo de interese estratéxica NEW HEALTH, do que a Universidade de Santiago (USC) é socia.
O proxecto promove a creación dunha plataforma transfronteiriza de innovación en saúde que conecte hospitais, centros de investigación e universidades e facilite o desenvolvemento de solucións avanzadas que melloren a calidade asistencial e o acceso aos servizos sanitarios. Entre as súas principais áreas de actuación destacan a aplicación de tecnoloxías emerxentes como a intelixencia artificial, a investigación en oncoloxía e enfermidades cardiovasculares, así como o impulso de modelos de gobernanza colaborativa.
A iniciativa sitúa a Eurorrexión Galicia–Norte de Portugal á vangarda da innovación sanitaria, impulsando unha nova xeración de atención baseada en intelixencia artificial, datos e medicina de precisión.
Toma de decisións informada
A reitora da USC, Rosa Crujeiras, compartiu unha reflexión sobre NEW HEALTH: “Datos tratados dun modo correcto, que sexan interoperables e que nos permitan obter información viable e veraz para unha toma de decisións informada no sistema sanitario, para facelo máis eficiente pero tamén a nivel das organizacións e da propia atención clínica”.
Cun orzamento de preto de 7 millóns de euros e o horizonte na fin de 2028, o proxecto está co financiado na súa maior parte polo Fondo Europeo de Desenvolvemento Rexional (FEDER) no marco do Programa Interreg VI-A España–Portugal (POCTEP) 2021-2027 dentro da sétima convocatoria que financia operacións de importancia estratéxica, definidas como proxectos de cooperación transfronteiriza que teñan un impacto significativo no territorio e xeren un valor sostible a longo prazo en áreas clave como innovación, cambio climático ou a saúde.
