Desde o tren pode distinguirse a poboación: algunhas casas e o que parece unha especie de igrexa. Unha estrada empedrada indica o camiño polo que se vai cara ao centro da vila. A pesar de contar con menos de 1.300 habitantes, a Colexiata da Xunqueira de Ambía ten con frecuencia visitantes. Pero se antes o coche era o medio de transporte habitual para os interesados na zona, agora os protagonistas son os trens (combinados con buses) que os levan ata esta construción.
Monumento nacional desde 1931, é unha igrexa románica creada na segunda metade do século XII. Porén, esta visita só é unha das bases. A experiencia parte dun total. Pouco antes, o paso pola bodega Gargalo permite degustar os seus viños Denominación de Orixe Monterrei. Máis tarde e tras un paseo por Allariz, o paso polo Ecoespazo do Rexo aínda deixa no padal ese sabor que tanto afana os amantes do queixo. O día remata no Baño de Molgas, que é museo, albergue e restaurante. O sabor, a vista, o son o olfacto e o tacto. Todos os sentidos activados nun camiño cun claro protagonista: o tren.
Os trens turísticos de Galicia –unha iniciativa da Secretaría de Turismo da Xunta– propoñen unha viaxe diferente, sen necesidade de coches e facendo rutas diferentes de forma sostible. Estaca de Bares, Cabo Ortegal, Vixía Herbeira, os acantilados de Loiba e Santo André de Teixido é o percorrido por unha das opcións máis demandadas, que tamén pasa por Viveiro. O pazo de Rubiáns, o castelo de Soutomaior e os xardíns do pazo Quinteiro da Cruz será outra das alternativas para moitos. E aí está a base. Moitas posibilidades a través de diversas rutas por toda a comunidade.
Oferta variada de transportes
Aínda que o tren será un dos medios principais de transporte, non é o único. O autobús achegará os visitantes a eses puntos algo máis afastados das estacións. E, como non podía faltar, tamén hai a opción de ir en catamarán polo río Sil. É o caso da ruta do viño na Ribeira Sacra e Valdeorras. Nesta poderás degustar produto con denominación de orixe na bodega A Coroa. Tamén coñecer máis a fondo o santuario das Ermidas e Os Peares, no que visitarás o seu museo ferroviario.
A ruta das Mariñas, a experiencia Mega e A Coruña de 1906, a dos mosteiros, a dos viños do Ribeiro e das Rías Baixas… Moitas opcións para unha viaxe na que non se depende do coche e que permitirá ver algo máis que as principais cidades galegas.
Poucas prazas libres
Iso si, os interesados xa non teñen todas as datas dispoñibles. A ocupación sitúase no 71,4%, aínda que quedan billetes para saídas de agosto, setembro e outubro. De feito, dous traxectos xa teñen o 100% das prazas cubertas. É o caso da ruta dos faros e que ata agora acadou unha ocupación do 98,4%. O segundo é a ruta dos Mosteiros que saíu o pasado sábado con 100 persoas a bordo e que tivo case cheo co 92,5% das prazas cubertas.
Outra que tamén está ao borde do cheo é a das Rías Baixas, que apenas conta con prazas dispoñibles e para unha única data: o 9 de agosto. O traxecto utiliza o cartel de completo desde o 28 de xuño, cando fixo a súa primeira viaxe sen deixar un oco libre. Os cidadáns tamén puideron desfrutar da ruta das Camelias, que xa fixo todas as súas viaxes e cunha ocupación do 93,5%.
Un turismo máis deslocalizado
A proposta é unha maneira de favorecer a visita a algúns dos puntos nos que destaca Galicia. Especialmente, aqueles situados fóra das cidades, con menos xente e nos que o seu paso, que se realiza en días soltos e en grupos organizados, poden ter un impacto positivo na economía local.
Iso si, ante todo, o máis importante para que as viaxes sexan sostibles é ter sentido común e comportarse de forma adecuada: non tirar o lixo no chan e respectar a fauna e a flora local. A intención de desconcentrar os destinos e dirixir os fluxos turísticos a outras zonas non só diversifica a oferta senón que ten como obxectivo que os visitantes se distribúan mellor por todo o territorio. No caso de Galicia, conta con diversos atractivos: as costas, vilas, pazos e a oferta gastronómica que se reparte ao longo de diversas localidades.
