A felicidade é un concepto subxectivo, pero hai quen trata de cuantificala mediante diferentes métricas. Este é o obxectivo do Spain Happy Index, desenvolvido pola empresa Sonneil Homes. Segundo este índice, o concello de Bergondo, na Coruña, é o máis feliz de Galicia, cunha puntuación de 82,94, seguido da cidade da Coruña e Oleiros.
Pero, como se mide a felicidade? A escala baséase en datos cuantitativos procedentes de fontes oficiais, como o Ministerio do Interior ou a Axencia Estatal de Meteoroloxía, co obxectivo de mapear os lugares con maior calidade de vida segundo os servizos dispoñibles.
Mentres que as zonas costeiras de Pontevedra e A Coruña parecen gozar de maior felicidade, os concellos situados máis ao leste das provincias de Ourense ou Lugo rexistran os niveis máis baixos. Así, A Veiga (Ourense) é o concello menos feliz, cunha puntuación de 47,52 sobre 100.
Ademais da felicidade, o índice ofrece información sobre días de sol, choiva e vento, temperatura media e poboación de cada concello. Con todo, o factor determinante á hora de medir a felicidade son os servizos dispoñibles.
Por que Bergondo?
Bergondo destaca como un lugar privilexiado que contribúe notablemente á calidade de vida dos seus residentes. Segundo o Spain Happy Index, convértese no concello máis feliz pola combinación de tres elementos fundamentais.
En primeiro lugar, a proximidade a infraestruturas clave, como a cercanía ao Aeroporto da Coruña (Alvedro) facilita a mobilidade e conectividade. En segundo lugar, a oferta educativa internacional na contorna próxima, como o Royal School ou o Coruña British School. En terceiro lugar, conta cunha excelente cobertura sanitaria, ao formar parte da área de influencia da Coruña, con acceso a 15 centros hospitalarios.
Outro factor que subliña a calidade da zona está nos seus concellos veciños. Tanto A Coruña como Oleiros son recoñecidos por cinco bandeiras azuis cada un, pola calidade das súas augas e servizos en praias e portos, o que complementa a oferta de benestar e ocio ao aire libre.
A felicidade da ría de Vigo
No mapa do Spain Happy Index, a ría de Vigo tínguese de verde. Concretamente, Vigo é o concello máis feliz deste enclave, con 82,6 puntos. A súa puntuación débese á dispoñibilidade dun aeroporto próximo como Peinador, nove recoñecementos de Bandeira Azul, a presenza de catro centros de ensino internacional nos seus límites e acceso a 11 hospitais na área metropolitana de Vigo.
Esta ampla oferta de servizos e calidade ambiental consolídanos como un destino moi atractivo para vivir. Séguenlle de preto, Moaña e Nigrán, con 81,79 e 81,43 puntos de felicidade, respectivamente. A súa alta valoración pode atribuírse á proximidade á cidade de Vigo e a contar tamén con distincións de Bandeira Azul nas súas costas.
A Veiga, un lugar infeliz?
No índice, o concello de A Veiga (Ourense) sitúase como o menos feliz de Galicia, reflectindo os retos derivados da súa localización e servizos.
A baixa puntuación débese fundamentalmente á distancia das infraestruturas esenciais: o aeroporto máis próxima para o acceso aéreo atópase a unha distancia de máis de tres horas e noutra comunidade autónoma, Asturias.
Ademais, o concello só conta cun hospital accesible na súa contorna, situada na comarca de Valdeorras, o que implica unha menor cobertura na área sanitaria máis próximo.
Podes consultar o mapa completo na seguinte ligazón.
Que o aeroporto más cercano se atopa a máis de 3 horas é falso, tanto Coruña, Santiago como Vigo e incluso Oporto se atopan a menos de 3 horas.
Coido que o título e o conxunto do artigo é algo enganoso, baseado nun ‘estudo’ dunha empresa adicada a vender casas…