A actividade sexual é unha parte esencial das relacións íntimas, aínda que tende a diminuír a medida que as persoas envellecen. Pero aínda que as investigacións demostran que a frecuencia da actividade sexual pode diminuír coa idade, para moitas persoas maiores o sexo segue sendo unha parte importante da súa vida.
Existe unha idea errónea de que a medida que as persoas envellecen, perden o seu interese polo sexo e a súa capacidade de comportamento sexual. Con todo, tal e como mostra unha enquisa realizada no Reino Unido (ver PDF), non é así.
De feito, a enquisa revelou que o 85% dos homes de entre 60 e 69 anos declaran ser sexualmente activos, do mesmo xeito que o 60% dos de 70 a 79 anos e o 32% dos de 80 anos ou máis. As mulleres resultaron ser menos activas sexualmente a medida que envellecían, pero os estudos mostran que, do mesmo xeito que os homes, moitas mulleres tamén queren seguir mantendo relacións sexuais a medida que envellecen. Os estudos realizados nos EUA revelan niveis similares de actividade sexual nestes grupos de idade.
E o feito de que tantas persoas sigan mantendo relacións sexuais a medida que avellentan é unha boa noticia, porque, como parece indicar a nosa nova investigación, canto menos sexo teñen as persoas maiores, máis probabilidades teñen de sufrir problemas de saúde mental e física.
Sexo e saúde mental
A nosa investigación analizou a vida sexual de 2.577 homes e 3.195 mulleres de 50 anos ou máis. Preguntámoslles se experimentaran un descenso no último ano no seu nivel de desexo sexual, a frecuencia da actividade sexual ou a capacidade de ter unha erección (homes) ou de excitarse sexualmente (mulleres).
Descubrimos que os homes que informaron acerca dunha diminución do desexo sexual tiñan máis probabilidades de desenvolver cancro ou outras enfermidades crónicas que limitaban as súas actividades diarias. Os homes e as mulleres que declararon unha diminución da frecuencia das actividades sexuais tamén eran máis propensos a experimentar unha deterioración na valoración do seu nivel de saúde. E os homes con disfunción eréctil tamén eran máis propensos a ser diagnosticados de cancro ou enfermidade coronaria. Con todo, é importante ter en conta que os cambios no desexo ou a función sexual poderían ser o resultado dunha enfermidade en fase temperá e non diagnosticada.
A nosa investigación tamén descubriu que os adultos maiores gozan máis da vida cando son sexualmente activos. E os que experimentan unha diminución da actividade sexual admiten ter un peor benestar que os que manteñen os seus niveis de desexo, actividade e función sexual na idade avanzada.
Tamén descubrimos que os homes que son sexualmente activos na terceira idade seguen tendo un mellor rendemento cognitivo en comparación cos que non o son.
Hormonas do benestar
Non é ningún secreto que o sexo pode axudar a producir ese factor de “sentirse ben”. Isto débese en gran medida a que durante o sexo prodúcese unha liberación de endorfinas, que xeran unha sensación de felicidade ou euforia. Con todo, isto non só repercute na nosa saúde mental, xa que un maior nivel de endorfinas tamén se asocia a unha maior activación do sistema inmune, o que pode reducir o risco de cancro e enfermidades cardíacas.
As investigacións suxiren que as persoas que manteñen relacións sexuais coa súa parella tamén son propensas a compartir unha relación máis estreita. E a proximidade á parella está relacionada cunha mellor saúde mental.
Tamén é importante lembrar que o sexo é unha forma de actividade física –a miúdo realizada a unha intensidade moderada– que queima preto de catro
quilocalorías por minuto. Todo exercicio conleva beneficios para a saúde, e o sexo non é diferente. Así que é posible que obteña beneficios para a súa saúde mental e física cunha actividade sexual regular.
Probar novas posturas
Por suposto, o sexo non é o único factor que pode axudar a mellorar a saúde e o benestar na terceira idade. Pero, como demostran as nosas investigacións, os adultos maiores non están desprovistos de desexo sexual, e unha vida sexual activa é algo que debería fomentarse. De feito, é posible que unha vida sexual regular e sen problemas poida conducir a unha mellor saúde mental (e posiblemente física).
Pero a información e o estímulo para probar novas posturas sexuais e explorar diferentes tipos de actividade sexual non se ofrecen habitualmente ás persoas maiores. E en moitos casos, cando se trata de persoas maiores e sexo, os médicos adoitan escorrer o vulto e evitan falar deste asunto.
Pero é moi posible que estas conversacións axuden a cuestionar as normas e expectativas sobre a actividade sexual. E, como mostra a nosa investigación, tamén podería axudar ás persoas a levar unha vida máis satisfactoria e saudable, ata ben entrada a terceira idade.
* Lee Smith é profesor lector de Saúde Pública e Actividade Física na Universidade Anglia Ruskin; Daragh McDermott é director da Escola de Psicoloxía e Ciencias do Deporte na mesma universidade, e Sarah Jackson é investigadora no Centro de Investigación sobre Psicoloxía e Hábitos Saudables da UCL.
Cláusula de divulgación: as persoas asinantes non son asalariadas, nin consultores, nin posúen accións, nin reciben financiamento de ningunha compañía ou organización que poida obter beneficio deste artigo e declararon carecer de vínculos relevantes alén do cargo académico citado.
