A organización dos Premios GCiencia Galicia Spin-Off decidiu ampliar ata o 11 de setembro o prazo de presentación de candidaturas da súa décima edición. A medida afecta ás categorías de Idea Emerxente e Grupo de Investigación, co obxectivo de facilitar a participación de empresas e equipos investigadores vinculados ao ecosistema universitario galego.
Na categoría Idea Emerxente poden presentar candidatura empresas que irrompesen nos últimos 24 meses cunha idea de marcado carácter innovador, baseadas na investigación e cunha especial vinculación co ámbito universitario. Pola súa banda, a categoría Grupo de Investigación está dirixida a grupos formalmente constituídos e activos nas universidades galegas e noutras institucións de investigación recollidas nas bases da convocatoria. A categoría Selo de Calidade, que recoñece a traxectoria consolidada dunha empresa, é proposta exclusivamente polo xurado e non admite candidaturas.
Os Premios GCiencia Galicia Spin-Off celebran este ano a súa décima edición, consolidados como un referente no recoñecemento da transferencia de coñecemento, o emprendemento científico e a innovación xurdida do ecosistema universitario galego. Desde a súa creación distinguiron empresas e grupos de investigación que destacan pola súa capacidade para transformar o coñecemento en impacto económico e social.
A ampliación do prazo permitirá ás entidades interesadas dispoñer de máis tempo para preparar a documentación e presentar candidaturas que reflictan adecuadamente a súa traxectoria, os seus logros e o seu potencial innovador.
As bases da convocatoria e toda a información sobre o proceso de presentación de candidaturas poden consultarse aquí.
