O mércores chegará a décima borrasca do ano, Pedro. Unha fronte fría entrará por Galicia deixando precipitacións, descenso nos termómetros e fortes refachos de vento. Con todo, MeteoGalicia achega esperanza: o servizo meteorolóxico informa de que o territorio estará baixo a influencia do anticiclón a partir do venres. “Agardamos tempo seco e cun importante ascenso das temperaturas máximas”, explican dende a súa sección de predición do tempo.
Mentres agardamos á chegada do 20 de febreiro, toda a comunidade espera avisos amarelos para o mércores 18 por ventos de superiores a 70-80 quilómetros por hora. Se falamos do mar, a alerta vólvese laranxa, con ondas de 5 a 7 metros. Ao longo do xoves, a fronte avanzará cara ao leste, polo que desprazará a influencia. En Galicia só se mantén o aviso laranxa por temporal marítimo e o amarelo por neve nas montañas de Lugo e Ourense.
Esta inestabilidade dará paso ás altas presións, acompañadas dunha dorsal en altura, que traerá unha estabilidade xeralizada. Segundo informa Roberto Granda en ElTiempo.es, podería haber algunhas precipitacións débiles concentradas no norte peninsular, froito do paso dalgunhas frontes, aínda que o prognóstico de MeteoGalicia aínda non ofrece datos tan concretos.
Esta noticia non indica a fin das chuvias. A vindeira semana aumentará de novo a probabilidade de precipitación, a partir do martes pola tarde. Por tanto, esta fin de semana será unha sorte de tregua para disfrutar.
