Biofabri, filial de vacinas humanas do grupo biofarmacéutico Zendal, incorpora ao seu equipo directivo a Rolando Pajón Feyt, referente internacional en inmunoterapia e desenvolvemento de vacinas, co obxectivo de reforzar a fase final do desenvolvemento clínico do seu candidato fronte á tuberculose, MTBVAC.
A incorporación do vacinólogo prodúcese nun momento decisivo para o proxecto, marcado polo avance cara ás etapas finais de avaliación clínica e pola necesidade de integrar ciencia, desenvolvemento clínico, regulación e estratexia de acceso ao mercado. Pajón Feyt asumirá o cargo de Director Médico e Científico de Biofabri (Chief Medical and Scientific Officer, CMSO).
Con máis de 30 anos de experiencia en vacinas e inmunoterapias, Pajón conta cunha traxectoria que abarca todo o ciclo de vida do medicamento, desde a investigación básica e traslacional ata a introdución comercial de produtos innovadores.
Traxectoria profesional
Ao longo da súa carreira liderou equipos internacionais responsables da xeración e análise de datos clave para procesos regulatorios, así como da súa presentación ante axencias, comunidades científicas e investidores. Especialista en vacinas de ARN mensaxeiro, enfermidades infecciosas e inmuno-oncoloxía, Rolando Pajón desempeñou un papel relevante no desenvolvemento dalgunhas das primeiras vacinas baseadas nesta tecnoloxía e na expansión do acceso a vacinas fronte á Covid-19 en América Latina.
A súa carreira profesional desenvolveuse inicialmente en Cuba e posteriormente durante máis de 18 anos en Estados Unidos, mantendo colaboración con organismos internacionais como a Organización Mundial de Saúde (OMS) e a Organización Pasamericana da Saúde (OPS), así como con redes científicas europeas e americanas.
O conselleiro delegado de Biofabri, Esteban Rodríguez (Chief Executive Officer, CEO), destacou que “a incorporación de Rolando Pajón reforza a nosa aposta polo talento internacional e supón un impulso estratéxico na recta final do desenvolvemento de MTBVAC. A tuberculose segue representando un desafío global e o noso compromiso é contribuír con solucións innovadoras e accesibles”.
Rolando Pajón é autor ou coautor de máis de 80 publicacións científicas en revistas de alto impacto, figura en máis de 14 patentes e participou na elaboración de materiais educativos especializados en vacinoloxía.
