Unha nova semana dá a benvida con chuvias en Galicia, nun contexto no que o anticiclón das Azores continúa a ser un dos grandes protagonistas. A pregunta repítese: se está relativamente preto, por que non cesan as precipitacións? Dende MeteoGalicia explican que a clave está na súa posición. O anticiclón mantense aínda demasiado ao sur. Mentres non ascenda cara ao norte da Península Ibérica, seguirá permitindo a entrada de borrascas atlánticas que circulan en latitudes máis altas. “Non teremos estabilidade nin tempo seco” ata que ese desprazamento se consolide, sinalan os técnicos do servizo meteorolóxico galego.
A influencia anticiclónica non é homoxénea. As precipitacións concéntranse especialmente na franxa atlántica, con maior incidencia nas provincias da Coruña e Pontevedra. O fluxo húmido do oeste e suroeste impacta con máis intensidade nestas áreas, mentres o interior pode rexistrar episodios algo máis intermitentes. A semana comeza así cunha fronte atlántica rozando o extremo norte peninsular, deixando chuvias localmente significativas. Está activada a alerta amarela por acumulacións de ata 40 l/m2 en 12 horas, principalmente nas comarcas do Eume e Betanzos.
Ata o xoves agárdase un patrón de chuvias intermitentes, abundante nubosidade e temperaturas suaves. O mércores, ademais, a alerta amarela por vento estenderase a toda Galicia, con refachos que poderán acadar os 80 km/h. En canto á neve, prevese que faga acto de presenza nas montañas de Ourense e Lugo, con acumulacións superiores aos 5 centímetros por riba dos 1000 metros.
De cara ao venres, os modelos meteorolóxicos apuntan á chegada dunha tregua. Isto traduciríase nunha fin de semana máis estable e seca. Con todo, haberá que consultar a evolución das previsións a medida que se acheguen as datas.
Máximas de 17ºC
A pesar da inestabilidade e das chuvias persistentes, as temperaturas mantéñense en valores suaves. Segundo os datos recollidos por MeteoGalicia, ás 12:30 horas acadábanse máximas na provincia de Lugo. En Santa Cruz, no Valadouro, rexistrábanse 17,3ºC, mentres que en Ribadeo marcaba 17,2ºC. O mesmo ocorre coas mínimas, cun valor extremo en Galicia de 6,5ºC en Riós (Ourense).
