Tras catro días de tregua, o martes 24 de febreiro volve a chuvia a Galicia. O desprazamento do anticiclón cara ao leste permitirá a chegada dunha primeira fronte entre o martes e o mércores. Así, das temperaturas primaverais do luns pasarase a tempo frío, momento no que un centro de baixas presións impactará contra o oeste da comunidade. Segundo informa o meteorólogo Mario Picazo en ElTiempo.es, Galicia será a comunidade que máis auga acumule durante a semana, a pesar de que non parecen frontes moi activas.
O mércores será o punto de inflexión. A mediados de semana, chegarán borrascas intensas que continuarán a afectar ás provincias do oeste, con xornadas chuviosas na Coruña e Pontevedra, especialmente no litoral, con acumulados de 20 a 40 l/m2, tal e como sinalan en Meteored. O anticiclón fará unha aparición estelar o xoves que poderá achegar claros e temperaturas estables, informa MeteoGalicia dende o seu perfil de X. Con todo, simplemente será unha pausa, xa que o venres chegará unha nova fronte que traerá precipitacións.
Como resumo, a previsión do servizo meteorolóxico galego explica febreiro rematará coa chegada dunha fronte pouco activa, aumentando a posibilidade de chuvia entre venres e sábado. Así, o mes de marzo, que dará comezo o domingo, será o resultado dunha situación intermedia entre altas e baixas presións con tempo cambiante e descenso das temperaturas.
Das temperaturas primaverais ao frío
Segundo MeteoGalicia, as temperaturas descenderán en só 48 horas. Por exemplo, en Santiago de Compostela, a máxima do luns será 20°C, pero dous días despois o termómetro marcará un valor máximo de 14°C, cunha oscilación térmica de 6 graos. Situacións semellantes vivirán Ourense, de 23 a 17°C; en Vigo, de 21 a 16°C; Pontevedra, de 21 a 16°C; e en Lugo, de 20 a 15°C. O caso máis extraordinario será o da Coruña, onde marcará unha máxima de 18°C o luns e só descenderá nun grao o mércores.
