O tren de borrascas que regou Galicia dende finais de 2025 ten unha data de fin. Con todo, entre o mércores e o xoves desta semana hai un novo sistema de baixas presións que acende as alertas na costa por ondas e en terra por fortes refachos de vento. A borrasca Pedro é, por fin, a última dunha sucesión case interminable. Está previsto que o anticiclón dos Azores se desprace máis ao norte, o que se traducirá en tempo solleiro e seco a partir do venres. Non obstante, non será unha tregua tan duradeira como as chuvias dos dous últimos meses e os distintos servizos de meteoroloxía xa poñen unha data de fin: a partir do martes 24 volven as chuvias a Galicia.
Tras un mércores e un xoves de alerta laranxa no litoral galego por ondas de ata sete metros e ventos de forza 8, así como por avisos amarelos en terra por refachos de ata 80 km/h e acumulacións de neve por enriba dos 1.000 metros, chega o tempo solleiro. Meteogalicia prevé para o venres néboas matinais no interior que irán diminuíndo conforme transcorra o día. Agárdase unha tarde de ceos moi abertos e despexados, e incluso de temperaturas agradables que poden rexistrar máximas de 16 graos. Unha día, en xeral, “tranquilo”, tal e como definen dende o servizo meteorolóxico galego.
Dos días primaverais á volta do inverno
O tempo seco e solleiro, así como as temperaturas moderadas nas horas centrais do día, estenderase ata, cando menos, o martes 24. Este escenario meteorolóxico débese á influencia dunha potente dorsal anticiclónica que se estenderá por toda a península e Baleares. Ademais virá acompañada dunha masa de aire cálido que será a principal responsable do aumento significativo das temperaturas durante os próximos días. “Isto dará como resultado uns días de marcados tons primaverais, nos que a suavidade térmica con sensación crecente de calor estenderase pola maior parte do país, dominando o ambiente solleiro e sen precipitacións”, prognostica o meteorólogo José Miguel Viñas nunha peza publicada en Meteored.
Non obstante, o anticiclón tan só durará cinco días. Segundo prevé Meteogalicia, a probabilidade de precipitación aumentará a partir da tarde do martes 24 de febreiro, chegando a acadar o 85%, polo menos ata o xoves 26. Este novo escenario deberase á chegada dunha fronte atlántica que entrará polo noroeste peninsular, e que deixará precipitacións en Galicia alimentadas polos ventos do suroeste. “Todo apunta a que esta situación abrirá de novo a porta a unha circulación atlántica do oeste sobre a península e Baleares”, advirte Viñas.
O cambio climático agravou a dina de Valencia
Os fortes episodios de chuvias das últimas semanas non só se restrinxiron a Galicia, senón que afectaron outras zonas da península, como Andalucía, con graves desbordamentos e inundacións. O fenómeno máis extremo e recente da memoria colectiva foi a dina de Valencia, que arrasou coa vida de máis de 200 persoas en outubro de 2024. Agora, un estudo da Axencia Estatal de Meteoroloxía (AEMET), do CSIC e da Universidade de Valladolid cuantifica por primeira vez as alteracións da estrutura interna das tormentas que provocaron a dina e relaciónaas co cambio climático.
En concreto, os datos apuntan a unha asociación clara. Estas variacións intensificaron a taxa de precipitación nun 20% e estenderon un 55% a zona afectada por precipitacións superiores a 180 mm. Así mesmo, aumentaron o volume total de chuvia na conca do río Xúcar nun 19%, en comparación coa era preindustrial. A investigación publicada na revista Nature Communications empregou simulacións de alta resolución para determinar a influencia do cambio climático na dinámica convectiva da tormenta, o proceso polo que se orixinan as precipitacións tras o rápido ascenso do aire cálido e húmido dende o mar ata as capas altas da atmosfera.
Referencia: Human-induced climate change amplification on storm dynamics in Valencia’s 2024 catastrophic flash flood (Publicado en Nature Communications)
