Cun pé posto xa na ponte, MeteoGalicia abría este venres 5 de decembro cun aviso: unha masa de aire moi húmida e cálida achégase a Galicia. Que implica isto? Segundo recolle un artigo publicado en Meteored, o desprazamento do anticiclón das Azores favorecerá un notable aumento das temperaturas.
En moitas comunidades, entre elas Galicia, os termómetros superarán a barreira dos 10ºC durante o mediodía do sábado e achegaranse aos 20ºC. Cidades do norte como A Coruña situaranse entre os 19 e os 20ºC, debido á chegada desta advección subtropical.
A pesar deste ascenso térmico, tanto o venres como o sábado manteranse as chuvias persistentes, con acumulacións importantes nalgúns puntos do suroeste, especialmente nas Rías Baixas, que se converterán na área máis afectada da península. Para o domingo e o luns prevese vento forte e algunha precipitación no oeste, xunto con ondas que poderían superar os 5 metros.
Segundo Meteored, é probable que a partir do martes as temperaturas vaian descendendo progresivamente de oeste a leste, permitindo que os termómetros regresen a valores máis propios do inverno meteorolóxico. Aínda así, as previsións non o poden confirmar con total seguridade por agora.
Mantense a alerta laranxa
Xa van tres días consecutivos de alerta laranxa na costa galega, segundo MeteoGalicia. Este episodio continuará o sábado e estenderase tamén ao mar das Rías Baixas, onde se agardan ondas que poderían acadar os seis metros. A provincia de Pontevedra será a máis afectada polas precipitacións, pois prevese que rexistre acumulacións superiores aos 40 l/m2 en 12 horas, o que manterá activada tamén a alerta amarela por chuvia.
O temporal marítimo persistirá na Costa da Morte, no noroeste da Coruña e na Mariña lucense. En terra, a Baixa Limia estará baixo a influencia das precipitacións durante o sábado. Deste modo, a ponte chegará a Galicia cunha combinación de temperaturas primaverais e chuvias persistentes.
