Refachos de máis de 145 km/h, ondas que alcanzaron os 18 metros de altura e un total de 2.617 raios. Estes son os números que deixa Herminia tralo seu paso por Galicia. Após dunha fin de semana chea de incidencias, o luns 27 de xaneiro a borrasca atlántica deixou números de récord na comunidade debido ás numerosas treboadas e os ventos furacanados no litoral. Malia isto, o tempo semella non querer dar un descanso e outra profunda borrasca, nomeada como Ivo, continuará coa inestabilidade e diversas alertas amarelas e laranxas no territorio para este mércores 29.
A borrasca Herminia deixou o seu prato forte durante este luns no territorio. As alertas vermellas no litoral galego predicían ondas de máis de 9 metros de altura, mais a realidade superou estes datos. Segundo os rexistros de Portos do Estado, estas chegaron a alcanzar os 18,17 metros de altura máxima na praia da Langosteira, en Fisterra. As redes sociais enchéronse de vídeos mostrando a potencia do mar na costa galega. Un deles, subido por David Couce a X, ensina como unha onda pasa por riba do faro de Meirás, en Valdoviño (A Coruña).
Las olas pasando por encima del faro de Meirás, Valdoviño, A Coruña.#BorrascaHerminia pic.twitter.com/KULKMmo6rt
— David Couce (@DavidCouce) January 27, 2025
Así mesmo, Herminia mantivo os seus ventos furacanados durante o luns, onde se acadaron os 147 km/h en Punta Candieira, en Cedeira; e os 141 km/h rexistrados no Penedo do Galo, en Viveiro. Todo isto acompañado de treboadas localmente fortes que documentaron un total de 2.617 raios, segundo informa Meteogalicia. As intensas chuvias chegaron a acumular en concellos como Avión máis de 52,4 l/m2 durante este luns. En Folgoso do Courel e Forcarei rexistráronse ata 43,3 l/m2.
Alertas por vento, chuvia e neve
Malia que a situación mellorará lixeiramente este martes con respecto ao día anterior, a alertas permanecerán activadas durante boa parte da xornada pola situación marítima. Así, para esta xornada do 28 de xaneiro, Meteogalicia mantén os avisos laranxas por ondas de máis de cinco metros de altura no noroeste da Coruña, Costa da Morte, Mariña lucense e Rías Baixas.
Xa de cara ao mércores, a profunda borrasca atlántica Ivo tomará o relevo de Herminia. A fronte fría asociada a este novo sistema de baixas presións prevese que provocará refachos moi fortes no mar, polo que Meteogalicia xa te activado avisos laranxas no litoral de Galicia. As alertas tamén se trasladan ás ondas, que poderán superar os cinco metros de altura no noroeste e oeste da Coruña e nas Rías Baixas. En canto a Mariña lucense o aviso diminúe un chanzo ata o amarelo, con ondas de ata catro metros.
Os ventos de cara ao mércores manteranse entre os 70 e 80 km/h en toda a comunidade, con aviso amarelo na Mariña, no litoral de Pontevedra e no oeste e suroeste da Coruña. As chuvias persistentes poderán acumular máis de 40 l/m2 en tan só 12 horas no interior de Pontevedra, mais tamén no “suroeste da Coruña e en Ourense”, prognostican fontes de Meteogalicia. A fronte fría asociada a Ivo tamén deixará alertas por neve, que terá unha cota sobre os 800 e 1.000 metros. Os territorios afectados serán a montaña de Lugo e Ourense con acumulacións de máis de dous centímetros
Máis neve
A xornada do xoves servirá de transición, polo que a inestabilidade meteorolóxica manterase. As cotas de neve poderán baixar ata os 500-700 metros de altura no oeste peninsular, “debido á entrada dunha masa de aire moi fría de orixe polar”, segundo indica a Axencia Estatal de Meteoroloxía. Pola contra, as chuvias manteranse na “metade leste, que se irán retirando cara ao norte co avance da mañá”, destaca Meteogalicia. As temperaturas mínimas estarán entre os 3 graos de Lugo e os 10 da Coruña, mentres que as máximas previstas para Galicia varían entre os 10 e os 14 graos.
28/01 11:36 #AEMET adelanta #FMA costeros en Galicia. Activos PASADO MAÑANA. Nivel máx naranja. Imagen del mapa de avisos en vigor a las 11:36 Para ver una tabla de avisos actualizada haga CLIC EN LA IMAGEN o visite https://t.co/JiRymofOY1 https://t.co/kkMcdPnFhr
— AEMET_Galicia (@AEMET_Galicia) January 28, 2025
