A forte borrasca Herminia acende as alertas por temporal de vento e chuvias intensas en toda Galicia

E tras unha relativa calma, volverá o temporal. Este venres Galicia mantense en alerta ante os avisos por fortes ventos e intensas chuvias que proceden dunha fronte activa asociada á borrasca Éowyn. Tras este intenso fenómeno, que xa está a ter serias consecuencias nas illas británicas, a comunidade vivirá unha xornada máis tranquila, pero o domingo regresará unha nova fronte asociada á borrasca Herminia que vén de activar alertas amarelas e laranxas en todo o territorio galego por potentes refachos e persistentes chuvias.

Após a xornada deste venres, no que Galicia mantén activadas diversas alertas amarelas e laranxas por fortes ventos, que poderán superar os 100 km/h na Mariña lucense e na montaña de Ourense, chegará un sábado de relativa calma previa a outro temporal. Despois da fronte activa responsable da climatoloxía deste 24 de xaneiro, unha masa de aire frío chegará o día 25 á comunidade, deixando chuvascos “localmente tormentosos” durante a mañá e folerpas de neve nas cotas altas do interior. Os ventos serán frouxos durante o día, pero intensificaranse coa chegada da noite.

Publicidade

Borrasca profunda Herminia

Será durante esta xornada cando se cree unha borrasca profunda no Atlántico, denominada Herminia, “que viaxará moi rápido ata as illas británicas e deixará en Galicia un forte temporal”, indican dende Meteogalicia. Os expertos agardan que a situación do domingo sexa peor ca deste ventes, polo que activaron diversos avisos amarelos e laranxas en todo o territorio.

Con respecto as chuvias, “se as do venres serán curtas pero intensas, as do domingo serán moito máis persistentes e poderán acumular máis de 80 litros por metro cadrado no interior de Pontevedra, no oeste e suroeste da Coruña e no sur de Ourense”, resaltan dende a axencia meteorolóxica galega. Por iso, nestas zonas os avisos laranxas están activados dende as primeiras horas da mañá do día 26. O resto de territorios galegos contan con alerta amarela, o que indica que as precipitacións acumuladas en 12 horas poderán superar os 40 litros por metro cadrado.

Publicidade

Vento forte e litoral adverso

Tamén o vento será forte durante a xornada do domingo. Segundo os expertos de Meteogalicia, Herminia “semella máis activa que a borrasca deste venres, o que podería deixar refachos máis intensos e durante máis tempo“. Por iso está activada unha alerta amarela para toda Galicia, malia que na Mariña lucense e no noroeste e oeste da Coruña existen franxas horarias con aviso laranxa.

A situación na costa tamén será moi adversa. Os ventos no mar poderán superar os 60 km/h, polo que están activados avisos amarelos e laranxas no litoral da Coruña, no de Pontevedra e na Mariña lucense. “As condicións serán moi semellantes as do venres, pero poderán ser algo máis intensas e persistentes a nivel local”, detalla Meteogalicia. Os refachos do suroeste continuarán soprando moi forte durante o luns 27. Ademais, as ondas superarán os cinco metros de altura, o que leva a manter unha alerta laranxa para todas as zonas mencionadas.