Temporal, frío e máis temporal. Así se pode resumir a situación climatolóxica que experimentará Galicia durante esta fin de semana. Dende este venres ata o domingo agárdanse dous días con numerosos avisos por ventos furacanados, intensas choivas e ondas que poderán superar os sete metros de altura. Todo isto intercalado por unha xornada de transición na que o frío deixará folerpas de neve nas cotas máis altas do territorio.
Segundo explican dende Meteogalicia, a situación atmosférica no norte de Groenlandia está a crear intensas borrascas en baixas latitudes sobre o Atlántico. A primeira delas, denominada Éowyn, afectará intensamente as illas británicas, onde esperan refachos de máis de 200 km/h. En Galicia, unha fronte “moi activa” asociada a esta borrasca deixará unha xornada de intenso temporal durante este venres 24 de xaneiro.
Avisos amarelos e laranxas
Así, para este día, a axencia meteorolóxica galega ten activados diversos avisos amarelos e laranxas. Os intensos ventos faranse notar en toda Galicia, con alerta amarela para todo o territorio, sendo un chanzo máis intensa na montaña de Ourense e na Mariña lucense, “onde se poderán superar os 100 km/h”. Con respecto ao mar, as condicións empeorarán durante o final da mañá e o comezo da tarde, sobre todo no noroeste da Coruña, na Mariña Lucense, nas Rías Baixas e na Costa da Morte, onde poderán darse refachos de forza 9, preto dos 80 km/h.
As precipitacións pasarán de ser febles durante a mañá do venres para ser puntualmente intensas pola tarde e noite. Os avisos amarelos por chuvias que poderán superar os 15 litros por metro cadrado nunha hora están activados no litoral de Pontevedra e no oeste e suroeste da Coruña. Tamén o mar verá esta evolución, pasando de aviso amarelo a laranxa a partir do mediodía, con ondas de máis de sete metros de altura no noroeste da Coruña, Costa da Morte e Rías Baixas. A Mariña lucense manterá a alerta laranxa durante toda a tarde e noite.
▫️Hoxe, tempo seco☀️
— MeteoGalicia (@MeteoGalicia) January 23, 2025
▫️Mañá, xornada ventosa ⚠️ chega unha fronte activa. Refachos > 80 km/h. Chuvia localmente forte
⚠️O domingo⚠️ Refachos por riba dos 100 km/h, xeneralizados cara á noite
📢Cómpre estar moi atentos das actualizacións dos avisoshttps://t.co/SHaElEAfjR pic.twitter.com/44yMOoII3R
Neve antes doutro temporal
Xa de cara ao sábado Galicia vivirá unha xornada de tranquilidade, con aire moito máis frío e chuvascos máis frecuentes pola mañá e “ocasionalmente tormentosos”, segundo Meteogalicia. Durante estas primeiras horas do día poderán caer algunhas folerpas de neve en cotas altas de Lugo e Ourense. As temperaturas descenderán, con mínimas que estarán entre os 5 graos de Lugo, 8 en Santiago e 11 en Vigo. As máximas estarán preto dos 15 graos nas principais cidades galegas.
Durante o domingo, o territorio experimentará outra xornada de temporal debido a unha fronte asociada a outra borrasca, “que probablemente se xerará durante o sábado”, acorde á información da axencia galega. Malia que os avisos aínda non están activados, dende Meteogalicia aseguran que será “bastante peor que o temporal do venres”, con maiores refachos de vento e chuvia.
