Catro días son os que faltan para que comece oficialmente a primavera. Tras semanas marcadas polo paso continuo de borrascas, o tempo dá un respiro en Galicia e tende a estabilizarse. Segundo MeteoGalicia, o anticiclón das Azores está situado sobre a comunidade, favorecendo ceos máis despexados e un notable ascenso das temperaturas. Este cambio notarase especialmente o martes, cando os termómetros poderán acadar os 25ºC en Vigo, Pontevedra e Ourense.
En Santiago de Compostela, A Coruña ou Lugo, as máximas tamén subirán, aínda que quedarán arredor dos 20ºC ata o mércores. Dende ElTiempo.es apuntan a que as previsións dependerán en boa medida da posición que adopte a borrasca Samuel e da intensidade do vento do sur.
A pesar dun inicio de semana soleado en terra, o temporal seguirá deixando pegada no mar. O servizo meteorolóxico galego indica que os modelos de ondas prevén a chegada de mar de fondo. Entre Fisterra e Estaca de Bares as ondas poderán superar os 5 metros, motivo polo que se activa a alerta laranxa, mentres que no resto da costa galega alcanzarán arredor dos 4 metros.
De cara á metade da semana, a estabilidade podería romper. O portal meteorolóxico Meteored sinala que entre o mércores e o xoves poderían rexistrarse algunhas chuvias febles e dispersas en Galicia, coincidindo co Día do Pai. A partir dese momento, a situación sinóptica podería experimentar un novo cambio. Os modelos apuntan á posible aproximación de baixas presións tanto polo Atlántico como polo Mediterráneo, o que abriría a porta a un final de semana máis inestable.
