O cicloturismo é unha actividade en auxe. Disparou o seu crecemento logo da pandemia, cando as actividades ao aire libre recobraron importancia. Por iso, estradas, carreiros e montes énchense cada día, sobre todo nas fins de semana, de apaixonados deste deporte que combina a actividade física co coñecemento da paisaxe.
Para ampliar o abano de opcións dos ciclistas existe un visor dixital que ofrece 82 rutas por boa parte das comarcas galegas que suman case 4.000 quilómetros. Un catálogo de percorridos para coñecer a xeografía galega que tocan 161 concellos das catro provincias.
A ferramenta interactiva permite seleccionar a zona, explorar a ruta e consultar as características do percorrido, como o desnivel ou os tramos que pasan por estrada, pista ou terreo sen asfaltar. Os datos da ruta poden descargarse en PDF ou nos dispositivos GPS e, deste xeito, ter o mapa connosco namentres damos pedal.
Seleccionar a ruta
O visor A paisaxe de Galicia en bicicleta da a posibilidade de seleccionar o concello de partida e axustalo ás nosas preferencias. Por exemplo, permite seleccionar se preferimos un percorrido interior ou pola costa. Ou se o ciclista quere sufrir máis ou menos cunha ruta doada, moderada ou difícil. Tamén especifica se o traxecto é circular para poder regresar ao punto de partida e minimizar os problemas loxísticos.
A ferramenta parte do traballo do Instituto Galego do Territorio (IGT) da Xunta de Galicia en colaboración ca Federación Galega de Ciclismo, a empresa Sherpa Project e os concellos polos que transcorren as rutas.
