Expertos e criadores, reunidos para abordar os últimos avances na cría sostible das razas porcinas e aviares que son autóctonas. Iso é o que propón este novo evento, centrado na epixenética e organizado por FEUGA no marco da Semana Verde de Silleda.
A epixenética estuda os xenes e como estes modifican a súa actividade segundo factores externos. Analiza ese proceso no que, aínda que a secuencia do ADN segue a ser a mesma, as condicións ambientais poden variar o comportamento dun organismo a través da activación ou non de certos xenes. Por exemplo, como a calidade do leite dunha vaca depende tamén de factores externos. Isto é porque segundo as súas condicións, a exposición a certas substancias e outros motivos, hai certos xenes que se expresan de forma diferente. Isto pode afectar á cantidade de proteínas, graxas presentes no produto final.
Os asistentes coñecerán, segundo promoven os organizadores, os recursos máis punteiros neste campo, de forma aplicada á reprodución dos animais. Isto está enmarcado no traballo desenvolvido polo proxecto europeo GEroNIMO. Tatiana Zerjal, co-coordinadora do proxecto e investigadora do Instituto Francés de Investigación para a Agricultura, a Alimentación e o Medio Ambiente (INRAE), será a encargada de presentar as súas principais achegas.
Asistencia libre e gratuíta
Outros dos temas a tratar serán a recuperación das razas autóctonas, a raza Galiña de Mos e o porco celta en Galicia. Tamén haberá unha charla de Roberto Besteiro, investigador do Centro de Investigacións Agrarias de Magebondo, sobre o uso da biotecnoloxía na trazabilidade e na selección xenética en razas minoritarias españolas.
A xornada terá lugar ás 13:30 horas en Sala Mirador do Recinto Feiral de Silleda. Será de asistencia libre e gratuíta previa inscrición na seguinte ligazón.
O proxecto europeo GEroNIMO (www.geronimo-h2020.eu) busca achegar ferramentas innovadoras baseadas no xenoma e o epixenoma coas que os criadores poidan optimizar os métodos de selección de animais, mellorando a súa saúde e benestar e preservando a diversidade xenética, á vez que se fai un uso máis eficiente dos recursos. Financiado polo programa Horizonte 2020, GEroNIMO arrincou en 2021 e conta coa participación de 21 socios de 12 países, entre os que se atopa FEUGA.
