Finais de maio, pero parece que o estío xa comezou. E é que a primeira alerta por altas temperaturas chegou onte, bastante antes de tempo. O anticiclón está deixando temperaturas moi anómalas, especialmente no sur e interior da comunidade, con máximas que chegaron o pasado mércores a 35 graos en Ourense ou 32 en Monforte e en Verín.
Estas temperaturas foron altas pola tarde pero descenderon con rapidez pola noite: destaca a alta oscilación, de máis de 15 graos en apenas unhas horas de diferenza. Nalgúns casos, foi incluso máis esaxerado. En Melide, as temperaturas pasaron dos 6 graos de madrugada a alcanzar os 30 durante a tarde.
Nas cidades, as mínimas en Ourense foron de 11 graos, igual que en Lugo. Nesta última, alcanzáronse máximas de 29 apenas unhas horas máis tarde. Máis moderación no noroeste da Coruña, onde viviron máximas de 23 graos en Ferrol e na capital de provincia.
A importancia da prevención
Este xoves, Meteogalicia volve activar a alerta amarela nas zonas de Valdeorras e nas áreas do Miño, tanto en Ourense como en Pontevedra. Os avisos estarán vixentes toda a tarde e, no paso do río máis longo de Galicia por Ourense, persistirán durante a tarde de mañá. Si afectará máis a calor noutros puntos da zona como en Abegondo, que se achegará aos 30 graos.
Os termómetros pasarán dos 36 graos en varios puntos da comunidade. Viviranse temperaturas de 31 graos en Pontevedra, 30 en Santiago e 36 na capital ourensá, segundo Meteogalicia. Iso si, pola tarde agárdase un crecemento de nubes de evolución na metade sur, que poderían deixar algún amago de treboada cara ao serán nas zonas montañosas do leste.
Para afrontar este episodio de calor, os expertos piden precaución. “É recomendable protexerse da calor e non facer exercicio físico intenso nas horas centrais do día”, asegura Rubén del Campo, portavoz da Axencia Estatal de Metereoloxía (AEMET), para Science Media Centre. Ademais, avisa da importancia de estar pendentes de persoas maiores e con patoloxías previas para evitar deshidratacións ou posibles golpes de calor.
Alerta por treboadas para o venres
Despois do anticiclón que deu estes días de verán en plena semana, o venres haberá unha maior inestabilidade atmosférica. O paso do bochorno deixará tormentas en moitos puntos da provincia de Lugo, con alertas activadas en gran parte do territorio do centro e nas montañas. Tamén estará activo no paso do Miño por Ourense. Como é habitual nestes casos, os modelos din que pola tarde haberá máis probabilidade de treboada.
Estas estarán acompañadas de altas temperaturas, que non variarán moito nas zonas de interior, como Ourense. Si que descenderán esas máximas no caso de cidades costeiras como Ferrol ou Vigo, nos que Meteogalicia espera que se manteñan por debaixo dos 24 graos.
