Unha DINA provocará treboadas e baixada das temperaturas na recta final da semana

O aire frío nas capas altas da atmofera e a entrada dunha fronte débil o martes aumentarán a inestabilidade en Galicia

O verán adoita ser sinónimo de tempo estable, solleiro e caloroso. Con todo, os primeiros días da estación máis longa do ano non se corresponden nin en temperaturas nin en condicións atmosféricas co esperable para esta época. Malia que Galicia comezará a semana con influencia anticiclónica, e acadará este luns os 34 graos en puntos da provincia de Ourense, o martes entrará unha fronte débil que deixará ceos moi nubrados e precipitacións, máis probables no interior. A inestabilidade continuará na segunda metade da semana pola influencia dunha Depresión Illada en Niveis Altos (DINA) situada no suroeste da península, que provocará treboadas e un notable descenso térmico, sobre todo nas máximas, que non superarán os 22 graos.

Segundo explican dende Meteogalicia, o luns será un día especialmente caloroso, sobre todo na metade sur, pola entrada de aire cálido en superficie. Isto provocará máximas que roldarán os 30 graos en todas as cidades galegas agás en Ourense, que se chegará aos 34 graos, e na Coruña, que non superarán os 23. Con todo, o tempo experimentará un cambio drástico coa chegada do martes, cando unha masa de aire frío en altura e a formación dunha DINA ao oeste de Portugal aumenten a inestabilidade atmosférica. Así é que os ceos estarán moi nubrados, sobre todo no oeste; prevense treboadas, que serán máis probables no interior de Lugo; e as máximas experimentarán un notable descenso, sobre todo no litoral atlántico, onde non se superarán os 22 graos.

Publicidade

A partir do mércores, máis inestabilidade

A situación de inestabilidade continuará durante o mércores, cun predominio do aire frío nas capas altas da atmosfera, ceos nubrados e chuvascos que poden ser treboentos, sobre todo no interior. Segundo a Axencia Estatal de Meteoroloxía (AEMET), será durante o xoves cando a DINA se posicione sobre o golfo de Cádiz para ir ascendendo nos días seguintes. “Irase desprazando cara ao norte deixando inestabilidade atmosférica para finais de semana, polo que a probabilidade de chuvascos treboentos seguirá sendo alta, especialmente no interior”, sinalan dende Meteogalicia. As temperaturas tamén se manterán en valores baixos, dado que a previsión non apunta a máis de 22 graos para a fin de semana en ningunha cidade galega.

Con todo, o meteorólogo Francisco Martín León apunta nun artigo publicado en Meteored que a DINA é moi difícil de predicir e é probable que se produzan cambios no prognóstico de cara aos vindeiros días. Malia a incerteza na previsión meteorolóxica, todo apunta a que “será moi activa en canto a precipitacións e tormentas”. Dende o portal eltiempo.es, o tamén meteorólogo Mario Picazo coincide no prognóstico con Meteogalicia e Martín León. Incide, ademais, no difícil que é predicir o movemento da DINA, e da súa traxectoria exacta dependerá canto pode afectar a Galicia.

Publicidade

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

A alimentación das vacas galegas xa non é un segredo: pódese trazar a través da súa leite

Investigadores galegos poñen a punto unha tecnoloxía capaz de discriminar os alimentos consumidos polas vacas a través de mostras da leite producida

As conas de vella voltan ás praias galegas

Aparecen novos exemplares deste molusco gasterópodo, cuxos varamentos aumentaron nos últimos anos e para os cales a ciencia aínda non atopa resposta

A transición de Galicia cara á modernidade a través do obxectivo de Antón Beiras

Unha exposición de fotografías tomadas polo oftalmólogo estrea en Muras as actividades do colectivo Legado Activo Beiras Cal

O galego José Tubío obtén unha prestixiosa bolsa Leonardo para investigar a hepatite B

O biólogo santiagués do CiMUS logra financiación da Fundación BBVA para a seu traballo sobre a mutación somática de tecido hepático