Un novo estudo revela o descubrimento de dúas especies de cogomelos inéditas en Galicia: Microglossum truncatum e Glutinoglossum triseptatum. A investigación, realizada pola Federación Galega de Micoloxía e impulsada pola Deputación da Coruña, atopou os exemplares nunha saída de campo no Pazo de Mariñán, situado no concello de Bergondo. O equipo tamén atopou a especie Galerina atkinsoniana, moi pouco frecuente e da que apenas hai rexistros en Galicia.
“O seu descubrimento en Mariñán supón un fito científico que pon de manifesto a singularidade do ecosistema do pazo”, trasladan fontes da Deputación en alusión á descuberta das dúas novas especies. Tamén poñen de relevo o achado de Galerina atkinsoniana, dado que só existía unha mención antiga en listaxes previas sen confirmar.
O obxectivo: a conservación
A saída de campo, realizada neste mes de xaneiro, supón a primeira de todas as que farán ao longo de 2026. Este estudo, impulsado pola área de Medio Ambiente da Deputación, xurdiu como resposta ás conclusións da I Xornada Micolóxica desenvolvida o 11 de outubro de 2025. “Naquel encontro constatouse a riqueza fúnxica excepcional e moi pouco estudada, pero tamén unha grave carencia: a falta de protección”, sinalan dende a institución provincial.
Por este motivo, o estudo promovido pola entidade provincial e desenvolvido pola Federación Galega de Micoloxía conta cun dobre obxectivo: científico e conservacionista. A identificación detallada das especies servirá de base para elaborar, ao remate do estudo, mapas de hábitats e materiais divulgativos (folletos e carteis) que sinalen as especies de valor e a prohibición expresa de recolección de cogomelos, así como da alteración do medio.
O estudo micolóxico no Pazo de Mariñán é desenvolvido pola Federación Galega de Micoloxía, entidade que agrupa a 17 asociacións. A investigación contempla un total de 18 visitas coa fin de realizar un seguimento exhaustivo dos fungos en todas as estacións.
