As augas de Baiona tinguíronse de marrón nos últimos días tras a ruptura da barreira antiturbidez que protexía a zona das obras de recheo. O movemento das ondas do mar provocou que a barreira cedese o pasado mércores e que parte da terra procedente dos recheos se esténdese por toda a zona. Iso si, a barreira xa foi recolocada.
Desde a asociación Salvemos Santa Marta veñen denunciando desde hai meses o impacto destas obras. Rafael Lores, socio fundador da organización, explica que de por si, estas barreiras non chegan ao fondo e, polo cal, non o protexen. “Pero e que ademais, coas mareas vivas destes días rebentou, mandouno todo para a terra e a barreira rompeu”, explica Lores. Agora, destaca, aparte do propio impacto deste recheo, todo ese lodo está estendido pola baía. “O mar de Baiona ten forza, sabíamos que iso podería pasar”, asegura.
O director facultativo das Obras de Construción de Peiraos e Recheos do Porto Deportivo de Baiona, Fernando Pérez, destaca que non son barreiras anticontaminación, senón antiturbidez. Recalca que as anticontaminación non son necesarias porque a pedra utilizada provén de canteira, segundo como pide o último estudo de impacto ambiental, realizado en 2002. “A barreira está despregada para confinar a turbidez provocada pola vertedura dos áridos de canteira, en ningún caso para o control de substancias contaminantes“, destaca un comunicado firmado polo propio López. “Non hai ningunha vertedura nin contaminación“, concreta Pérez, e recorda que a obra está aprobada por Portos de Galicia.
López clasifica as mareas vivas vividas o pasado día 5 como “extraordinarias”, motivo polo cal esa barreira antiturbidez sufriu danos. Ante esta situación, deron a orde de asegurala o mellor posible durante esa xornada, malia que acharon que a barreira apareceu de novo solta este xoves. De feito, os traballos a realizar na obra nesa xornada é, unicamente e segundo asegura un comunicado, para a reparación e despregue da barreira. Debido ás condicións e que esta se atopa nunha situación de vulnerabilidade ata o venres 7, o facultativo das obras asegura que se terá a máxima precaución.
Denuncias por uso de escombros de obra
Con todo, Lores contradí a versión de Pérez e asegura que teñen detectado materiais non permitidos segundo o estudo de impacto ambiental. De feito, en xuño deste mesmo ano denunciaron o uso de escombros de obra procedentes da urbanización do vigués Barrio do Cura ante o Servicio de Protección da Natureza (Seprona). “Despois empezaron a usar material dunha canteira, pero máis tarde fixámonos que había restos de plástico, de tuberías, polo que cremos que, de novo, non era material de canteira”, defende Lores.
Ademais, a asociación tamén denuncia que as obras estanse a facer a partir dun estudo de impacto ambiental que se fixo en abril de 2002. “Pedimos parar as obras, que se estude o impacto que houbo tras o primeiro recheo que se realizou e que se faga unha nova valoración cun novo diagnóstico de impacto ambiental”, esixe Lores. Malia estas denuncias, Portos de Galicia daba nun comunicado en maio todas as garantías ambientais ao proxecto. Facíao co apoio tamén, hai un ano, do informe favorable do Ministerio para a Transición Ecolóxica.
Unha ampliación de 4.200 metros cadrados
As obras de recheo pretenden ampliar os espazos en 4.200 metros cadrados. Forman parte dun investimento de 4 millóns de euros co que se ampliará a superficie nun 77,8%, pasando de 5.400 metros cadrados a 9.600.
Tras esta primeira fase darían paso á construción dun edificio, que incluirá un restaurante, unha cafetería e distintos locais que permitirá diversas actividades como o alquiler de motos de auga. Ademais, o plan é alugar distintos espazos de hostelería e ampliar os aparcamentos destinados ao público xeral.
