“Teño que pensar en que nome pórlle a ese polbo. Dáme a vida”. Con este agarimo fala o fotógrafo Xaime Beiro sobre o suxeito dalgunhas das súas imaxes máis destacadas, que veñen de ser compartidas pola sección Earth da British Broadcasting Corporation (BBC) nas súas redes sociais. O galardoado artista e submarinista de Muros inmortaliza a riqueza mariña, especialmente da zona de Louro, creando espectaculares instantáneas subacuáticas cheas de cor e nitidez. O seu obxectivo: “Poñer en valor a nosa biodiversidade, non dende o punto de vista económico, senón para protexela”.
Con máis de 50.000 reaccións no momento no que se escribe este artigo, a publicación realizada pola compañía británica comparte unha pequena galería de imaxes de Beiro na que os protagonistas son os polbos. “Hai dous días puxéronse en contacto comigo para dicirme se quería colaborar con eles e non tiven nin que pensalo”, relata o fotógrafo. Así, a sección Earth da BBC publicou unha escolma de oito instantáneas para falar sobre as características dos cefalópodos.
Polbos de Louro
Segundo indica o autor, todas as fotografías foron realizadas ao longo de varios anos na costa de Louro. “Faime moita ilusión que compartan imaxes feitas aquí e, ademais, moitas delas son do mesmo polbo”, detalla. Este exemplar é un modelo destacado da arte de Beiro. “Ademais de saír en varias das instantáneas que compartiu a BBC, tamén é protagonista das miñas publicacións máis virais e os meus traballos máis vendidos. Teño que pensar en pórlle nome. Dáme a vida e débolle moito”, detalla.
Ademais de espectaculares fotografías, o autor tamén realiza vídeos submarinos nos que plasma a beleza da biodiversidade galega. A súa calidade artística fai que leve tres anos consecutivos gañando o Campionato Galego desta especialidade. “Malia que sempre fago fotografía e vídeo cando me vou mergullar por Louro, este ano quero centrarme máis en vídeo, a ver se podo volver capturar máis momentos con este pulpiño“, comenta. Co seu traballo busca que se valore máis o polbo de aquí. “Témolo como un símbolo pola nosa gastronomía, pero esta especie é espectacular polas súas características animais e deberíase apreciar moito máis“, conclúe.
