A Gran Ruta de Ecoturismo Científico en España foi certificada como Ruta Observer de Turismo Científico; un distintivo que avala o seu valor como experiencia de turismo responsable, baseada na divulgación científica e na conservación da biodiversidade. Este roteiro pioneiro conecta algúns dos espazos naturais máis emblemáticos do país con experiencias deseñadas para achegar os viaxeiros ao coñecemento científico e á protección da fauna ibérica e dos seus hábitats. Está certificada pola plataforma galega Observer Science Tourism.
Fauna e espazos clave no Gran Roteiro
Ao longo do roteiro, os visitantes poderán descubrir algunhas das especies máis icónicas da biodiversidade española e os programas que garanten a súa conservación. Entre elas salienta o quebraósos (Gypaetus barbatus) nos Pireneos e Picos de Europa, onde se desenvolven proxectos de recuperación desta especie clave para o equilibrio ecolóxico. Tamén o lince ibérico (Lynx pardinus), un dos felinos máis ameazados do mundo e que hoxe atopa refuxio en espazos como a Serra Morena xienense e os Montes de Toledo; e o oso pardo cantábrico (Ursos arctos arctos), símbolo da conservación na Cordilleira Cantábrica.
Amais destas tres especies cabe mencionar a aguia imperial ibérica (Aquila adalberti), unha ave rapaz emblemática do centro e suroeste peninsular; e o voitre negro (Aegypius monachus), o maior dos voitres europeos e visible en diversas serras españolas.
Os programas que garanten a conservación destas cinco especies lévanse a cabo en 15 espazos naturais de referencia, entre os que Observer salienta os seguintes: Parque Nacional de Ordesa e Monte Perdido (Aragón), Parque Natural de Somiedo (Asturias), contorna do Parque Nacional de Monfragüe (Estremadura), Parque Nacional da Serra de Andújar (Andalucía), Parque Nacional dos Picos de Europa (vertente de Asturias), Montaña Oriental e Liébana (Cantabria) e o Parque Natural Prat de Cabanes-Torreblanca (Comunitat Valenciana).
O papel de Observer na certificación da Gran Ruta
Observer desenvolveu un proceso de certificación que garante que a Gran Ruta de Ecoturismo Científico cumpre cos principios do turismo científico. Este recoñecemento avala que o roteiro ofrece experiencias baseadas no coñecemento científico, con actividades lideradas por expertos en conservación e divulgación. Tamén, que promove un turismo sostible e responsable, minimizando o impacto ambiental e contribuíndo á conservación dos ecosistemas. Finalmente, que fomenta a participación activa do visitante, permitíndolle coñecer e apoiar proxectos reais de investigación e protección de especies.
Ademais da certificación, Observer elaborou un mapa informativo, que detalla os principais puntos de interese do roteiro e as experiencias de ecoturismo científico asociadas a cada destino. Este material, dispoñible en formato dixital e impreso, facilita aos viaxeiros a planificación do seu percorrido, destacando que actividades poden realizar en cada enclave natural.
