A Mariña Lucense converteuse no primeiro destino en Galicia en obter a certificación Observer na categoría de Destino Ornitolóxico, un recoñecemento que avala a súa riqueza natural e o seu potencial como enclave de referencia para o turismo de observación de aves. Este selo, concedido tras un proceso de avaliación, distingue a comarca pola calidade dos seus hábitats, a diversidade de especies que alberga e a concienciación sobre a observación responsable da avifauna.
Situada no noroeste de Galicia, A Mariña Lucense é un territorio privilexiado para o turismo ornitolóxico. As súas catro Zonas de Especial Protección para as Aves (ZEPA), incluído o Corredor Migratorio Galaico-Cantábrico Occidental, convértena nun punto estratéxico para a observación de especies mariñas, limícolas ou rapaces, entre outras moitas. Entre as máis destacadas que poden avistarse na comarca atópanse o cullereiro común (Platalea leucorodia), o mazarico real (Numenius arquata), o furabuchos balear (Puffinus mauretanicus), o corvo mariño cristado (Phalacrocorax aristotelis) e o mascato boreal (Morus bassanus).
A certificación Observer outórgase a aqueles destinos que cumpren con criterios de calidade na promoción do turismo ornitolóxico sostible, asegurando unha experiencia enriquecedora para os visitantes e un baixo impacto sobre a contorna natural.
Turismo e biodiversidade van da man
Como parte do proceso de investigación e posta en valor da riqueza ornitolóxica do territorio, A Mancomunidade de Concellos da Mariña Lucense desenvolveu un conxunto de ferramentas para facilitar a experiencia aos afeccionados á observación de aves. Entre elas, un apartado web especializado dentro da web; un folleto informativo trilingüe (galego, español e inglés) con puntos de observación e información de especies; paneis interpretativos en enclaves estratéxicos, con información sobre as aves locais e os seus hábitats que serán instalados nos próximos meses, unha vez se obteñan as autorizacións necesarias; e material educativo para escolares, coa creación dunha unidade didáctica para fomentar o coñecemento e a conservación da avifauna entre os máis novos.
Coa obtención do selo, A Mariña Lucense entra no mapa do turismo ornitolóxico de calidade, reforzando a súa posición como destino de referencia nacional. Ademais, a certificación inclúe a creación dun perfil oficial na plataforma Observer, que permitirá dar visibilidade a este destino entre a comunidade de observadores de aves.
Esta certificación supón un paso adiante na aposta por un turismo sostible e especializado, contribuíndo ao desenvolvemento económico da comarca e promovendo a conservación do seu patrimonio natural. A Mariña Lucense colócase así como un exemplo de como o turismo e a biodiversidade poden coexistir en harmonía.
Estas accións están promovidas pola Mancomunidade de Concellos da Mariña Lucense no contexto do Plan de Sustentabilidade Turística na Mariña Lucense 2022-2024, cofinanciado pola propia Mancomunidade, a Xunta de Galicia e a Secretaría de Estado de Turismo.
